भांगरभूंय | प्रतिनिधी
म्हाका बसीन प्रवास करपाक खूब आवडटा. विंगड विंगड लोक, वाठार, तांचे भेस, जेवण खाण, तांची संस्कृताय हांचो लागींच्यान अणभव बसीन भोंवडी करतना घेवंक मेळटा.
बसींतल्यान 30 ते 35 लोक प्रवास करीत आसतात. आपलो गांव वा शार येतकूच थोडे लोक देंवतात. फुडल्या स्टॉपार वचपी परतून बसींत चडटात. प्रवासी, बसीच्या ड्रायव्हराक वा कंडक्टराक वळखनात. तीस पस्तीस लोकांक घेवन बस चलोवपी ड्रायव्हर मुखार पळयत आसता. ताची एक सादी चूक लोकांचो जीव घेवंक शकता. पूण जाणून बुजून आनी बसीच्या ड्रायव्हराचेर आनी आपल्या नशिबाचेर विस्वास दवरून लोक, लागींचो वा पयसुल्लो प्रवास करतात.
ड्रायव्हराक आपले मन एकाग्र करून ड्रायव्हींग करचें पडटा. तो जेन्ना ड्रायव्हींग करता, तेन्ना फक्त ताचें मन आनी तो. बस जेन्ना निमाण्या स्टॉपार वा मदीं च्याक वा जेवणाक रावता, तेन्नाच तो हेरां वांगडा भासाभास करूंक शकता. आपलें मन उक्तें करूंक शकता.
हाचें उरफाटें बसीच्या कंडक्टराची अावतिकाय आसता. दीसपट्ट्या शेंकड्यांनी विंगड विंगड लोकांची ताचे कडेन वळख जाता, भासाभास जाता. शेंकड्यांनी लोकां कडेन ताचो संबंद येता. पूण तातूंतलो एकलोय ताचो सोयरो-दायरो वा इश्ट नासता. दीसभर कितलेशेच किमि प्रवास तो करता. पूण ताका खंयच वचपाचें नासता. जे बसींतल्यान तो प्रवास करता, ते बसीचो धनी तो नासता. ताचे कडेन दीसपट्टे हजारांनी रुपया येतात आनी वतात. पूण तातूंतलो एक पयसो लेगीत ताचाे नासता. एकदां ड्युटी सोंपली, काय ताचे कडेन आसा तितलेय डेपोंत व्हरून दिवन, ताचो ताका हिशोब दिवचो पडटा.
आमची जीण अशीच आसता… जिणेंत खरोच सुखी जातलो जाल्यार आमकां बसीच्या कंडक्टरा भशेन जगपाक शिकूंक जाय….
एकनाथ सामंत
9226219723
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
