भांगरभूंय | प्रतिनिधी
पोरणें गोंयचो वादग्रस्त बंगलो, आसगांवां घरांतल्या लोकांक किडनेप करून मोडिल्लें घर, रामा काणकोणकारा वेलो हल्लो सगलीं प्रकरणां फाटीं पडलीं. कोणाचेरूच कसलीच कारवाय जावंक ना, अजून तपास चालूच आसूंक जाय काय फायली बंद जाल्यो तेंय कोणाक खबर ना. तरी चार दीस बोवाळ करून लोक सगलें विसरून गेले. लोकांक खिणा खातीर हें सगलें करपाचें आसता काय दिसता. उपरांत विसरून वचपाचें आनी नव्या वादांत घुस्पुपाचें. तशीं नवे नवे वाद आनी नवे विशय आमकां मेळत आसतात. सद्याक एक प्रकरण नव्यान वयर सरलां. पुजा नायक प्रकरण म्हणजेच कॅश फॉर ज्योब प्रकरण. बेकार भुरग्यांक नोकरेचें हांयस दाखोवन तांचे कडल्यान दुडू घेवन तांकां फटयले म्हणून कांय लोकांनी तिचेर पुलीस कागाळ केल्ली आनी कांय तेंपा पयलीं तिका अटकूय जाल्ली. मुखार हें प्रकरण फायलींत पडून उरलें. जांकां अटक जाल्ली ते जामिनार भायर सरले. आनी लोकूय हें प्रकरण विसरून गेले.
आतां अकस्मात जिल्हाे परिशद वेंचणुको जाहीर जाल्यो आनी बरोब्बर ह्याच समयाक पुजा नायकाक कंठ फुटलो. आपणें सशें अठरा जाणां कडल्यान सतरा कोटी आडसश्ट लाख रुपया एकठांय करून सरकारांतल्या एक वरिश्ठ मंत्र्याच्या सांगण्या वेल्यान, एक आयएएस ऑफिसर आनी भौशीक बांदकाम खात्याच्या वरिश्ठ इंजिनियरा कडेन दिल्ले. पूण अजून मेरेन एकाय भुरग्याक नोकरी मेळूंक ना म्हणपाचें सांगून तिणें चोवीस वरां भितर ते पयशे परते दिवचे म्हणपाची मागणी केली. आनी पयशे मेळ्ळे ना जाल्यार आपूण त्या पयशे घेतिल्ल्यांचीं नांवां वाऱ्यार घालतली म्हणपाची धमकी तिणें दिली. आतां जो वेळ तिणें साधला तो पळयल्यार हाका इल्लो राजकारणाचो वास मारता. कारण ह्या प्रकरणांतल्या लोकांक अटक जावन वर्स जायत आयलें. हे सगले जामिनार सुटल्यात. हांकां जेन्ना अटक जाल्ली त्याच वेळार तिणें हें सगलें सांगूंक जाय आसलें.
जामिनार सुट्टकूच तरी तिच्यान पत्रकार परिशद घेवन आपणांक ह्या तिगांनी फटयली म्हणून सांगूक जातालें. पुजा सांगता ते प्रमाण तिचे कडेन सगले पुरावे आसात. आपल्या मोबायलाचेर कांय व्हिडियोय आसात. आपणांक अटक जाली तेन्ना आपणे ते पुलिशेक दिल्यात. ती सांगता तें खरें आसत जाल्यार पुलिशेन अजून कारवाय कशी करूंक ना? सतरा कोटी म्हणल्यार ल्हान रक्कम न्हय. बरें ज्या सशें अठरा भुरग्यां कडल्यान पुजान पयशे घेतल्यात तातूंतल्या कितल्या भुरग्यांनी पुजा आड कागाळ केल्या? करूंक ना जाल्यार कित्याक करूंक ना? सत कितें तें कळटलें जाल्यार त्या भुरग्यांनीय मुखार येवपाची गरज आसा.
पुजा म्हणटा आपूण मगोच्या कार्यालयांत काम करतालीं. म्हणटकूच ह्या पयश्यांची देवाण घेवाण त्याच कार्यालयांत जाली काय कितें तेंवूय पळोवंक जाय. जांणी पुजा कडेन पयशे दिल्यात तेच हें सांगूंक शकतले. आनी जर मगोच्या कार्यालयांत पयश्यांचो वेव्हार जाला जाल्यार मगोचे फुडारी तातूंतल्यान हात फांफडूंक शकनात. तांणी जापसालकी घेवचीच पडटली. तुमच्या ऑफिसांत कितें चलता ताचेर तुमची नदर आसूंक जाय न्हय. पुजाक काय कोण वळखुचे नात आनी पातेवचेय नात. ती खंयच्या तरी पक्षाच्या कार्यालयांत आसा आनी त्या पक्षाचो आमदार एक मंत्री म्हणटकूच ताचेर पातयेवनूच हो वेव्हार जाला अशें आमच्यांनी म्हणूं येता. सशें अठरा भुरग्यां कडेन जेन्ना कोणूय वेव्हार करता तेन्ना आफिसांतल्या लोकांचे नदरेक तें वतलेंच न्हय? मागीर मगोचे ऑफीस बेरर कितें दोळे धांपून बसताले तर?
म्हणटकूच आपल्या ऑफिसांत हें सगलें घडूंक नाशिल्लें म्हणपाचे पुरावे दिवपाची जबाबदारी मगोचेर येता. जांणी कोणे पयशे दिल्यात तांणी मुखार येवन सत सांगचेली गरज आसा. पुजा सांगता आपली णव जाणांची टीम आसली. णवूय जाणां मगोच्या ऑफिसांत येतालीं? काय आनीक खंयच्या ऑफिसांत कामाक आसलीं हाचोय सोद घेवचो पडटलो. हांतलें सत जर सोदून काडलें ना जाल्यार लोकांचो सरकाराचेर जो कितें इल्लो भरंवसो उरला तोय ना जावंक वेळ लागचो ना. कांय जाण एकठांय येवन समांतर कामगार भरती केंद्र उबें करता. सश्यां वयर भुरगीं तातूंत आपलें नांव नोंद करता आनी खंयचेच सरकारी यंत्रणेक हाची सुलूस लेगीत लागना हाका कितें म्हणपाचें? सामकें सरकाराकूच आव्हान दिल्ले वरी जालें ना हें? कोण तरी वयल्या थरा वेलो सरकारी मनीस सामील आसले बगर हें जावप शक्यूच ना हें वेगळें सांगचेली गरज आसा? हातूंत खरें कितें आनी फट कितें तें सोदून काडप सरकारची जबाबदारी. पूण सरकार हें करतलें?
जेन्ना एखादो कोणूय हय हें हांवें केलां म्हणपाचें सांगता आनी तातूंत अमको अमको सामील आसा म्हणपाचेंय सांगता तेन्ना तातूंत इल्लें तरी तथ्य हें आसतलेंच. खंय तरी उजो लागले बगर धुंवर कसो वयर सरतलो? तातूंत जीं नांवां आयल्यांत तीं ल्हान सान व्यक्तींची न्हय. सगले वरिश्ठ लोक. वरिश्ठ मंत्री, आयएएस ऑफिसर आनी वरिश्ठ इंजिनियर. हीं नांवां आयिल्ल्यान सरकाराची जबाबदारी आनीक वाडटा. ह्या प्रकरणाची निश्पक्ष चवकशी जावन सत भायर सरूंक जाय. आनी निश्पक्ष चवकशी जातली जाल्यार सरकारान दोनूय ऑफिसरांक निलंबीत करूंक जाय आनी मंत्र्याचो राजिनामो घेवंक जाय. आपणाचेर किटाळ आयलें म्हूण राजिनामो दिवपी लोक आतांच्या संवसारांत ना. देखून हांचो राजिनामो घेवचो पडटा. हे लोक त्या त्या पदार आसतना सारकी चवकशी जावप कठीण. आनी पुलिसांनी कितलेय निपक्षपणान कारवाय केली तरी लोकांचो विस्वास बसप भोव कठीण. पळोवया सरकार हातूंतल्यान कशी वाट काडटा आनी कितें निकाल येता तो.
अभयकुमार वेलींगकार
9423884687
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
