भांगरभूंय | प्रतिनिधी
सिनेमा प्लॅटफाॅर्मांचो मुखेली इम्मड्डी रवी हाका अटक
हैदराबाद, खबरां संस्था: हैदराबाद पुलिसांनी iBomma आनी Bappam TV ह्या मुखेल चित्रपट पायरेसी प्लॅटफॉर्मा फाटलो कथीत मास्टरमायंड इम्मड्डी रवी हाका अटक केली. पुलिसांनी हे कारवायेंत ३ कोटी रुपया रोख जप्त केले. हाका लागून वट्ट २० कोटी रुपयांचें पायरेसी नेटवर्क उक्तडार आयलां.
३२ वर्सां पिरायेचो रवी हो संगणकशास्त्राचो पदवीधर आशिल्ल्यान २०१९ सावन देशांतल्या सगल्यांत व्हड आनी अत्याधुनीक पायरेसी इकोसिस्टम तयार केल्ल्याचो आरोप आसा. हैदराबादचे पुलीस आयुक्त वी.सी. सज्जनार हांणी सांगलें, रवीन आपले संचालन अमेरिका, नेदरलॅण्ड्स आनी स्वित्झर्लंड हांगच्या सर्व्हरा वरवीं केलें. नवे प्रदर्शित चित्रपट कांय वरांनीच लीक करपाची तांक ह्या नेटवर्का कडेन आशिल्ली.
ताचे मालकीचे ११ परस चड डोमेन नेम आशिल्ले, सरकारी ब्लॉकिंग टाळपा खातीर तो डझनभर मिरर सायट्स वापरतालो, एकाच वेळार तो ६५ मिरर साइटींचेर सक्रिय आशिल्ल्याचो पुलिसांचो दावो केला. मिराई, डूड, कांतारा चॅप्टर 1, OG अशे हालींच खुबशे चित्रपट ह्या प्लॅटफॉर्म वरवीं पायरसी जाले.
सायबरक्रायम युनिट्सच्या समन्वयान ही कारवाय केली. पायरेसीक लागून चित्रपट निर्मात्यांक व्हड अर्थीक लुकसाण जाल्लें. रवीक अटक केल्ल्यान देशभरच्या पायरेसी नेटवर्कचेर परिणाम जावपाची शक्यताय उक्तायल्या.
ह्या प्रकरणाक राजकीय रंगूय मेळ्ळा. आंध्र प्रदेशचे उपमुख्यमंत्री पवन कल्याण हांणी सोशल मीडिया ‘X’ चेर हैदराबाद पुलिसांची आनी आयुक्त सज्जनार हांची तोखणाय केली. हे विशीं पुलिसांचो तपास चालूच आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
