भांगरभूंय | प्रतिनिधी
बिहार विधानसभा वेंचणुकेच्या राजकी महानाट्याचो पड्डो पडटकच राष्ट्रीय राजकारणाच्या पटार आतां एकाच प्रस्नाचेर ठळकपणान चर्चा जातना दिसून येता. राहुल गांधी आनी तांच्या महागठबंधनाचो फुडार कितें होच तो प्रस्न आसा आनी ताची जाप रोखडीच मेळप कठीण आसा. भारतीय जनता पार्टी आनी इश्ट पक्षांचो अश्वमेध आडावप फक्त अशक्य असल्याचें बिहारांतूय निर्विवाद स्पश्ट जाल्ल्यान विरोधकांचे कितें जातलें हो प्रस्न पडप सहाजिकूच आसा. केंद्रांतली सत्ता आसूं वा राज्यांचें राजकारण, बिहारचे परिणाम सदांच दिल्ली मेरेन राजकी पडसाद उमठावपी आसतात. अंदूंचोय निकाल ताका आडवाद थारपाचो प्रस्नूच नाशिल्लो. प्रधानमंत्री नरेंद्र मोदी आनी तांच्या फुडारपणा खाला राष्ट्रीय लोकशाय आघाडीन दोळे दिपकावपी जैत जोडून विरोधी महागठबंधनाक गंभीर आत्मपरिक्षणाक सामकार वचपाक भाग पाडलां हातूंत मात लेगीत दुबाव ना. हालींच जाल्ले विधानसभा वेंचणुकेंत महाराष्ट्रा सयत खुबश्या राज्यांनी फक्त अपेसूच पदरांत पडले उपरांत बिहारांत निदान महागठबंधन चमत्कार घडोवन हाडपाची अपेक्षा सगल्यांकूच आशिल्ली. प्रस्थापितांच्या विरोधांतल्या ल्हाराचेर सवार जावन तेजस्वी यादव आनी राहुल गांधी ही जोडी चमत्कार करपाक गेली खरी, पूण चमत्कार मात वेगळोच जालो. राहुल गांधी आनी तेजस्वी यादव हे वेंचणुकेंत पुरायपणान उध्वस्त जाले आनी ताका लागून महागठबंधनाच्या फुडाराचो प्रस्न उपस्थीत जालो.
सुमार दोन दसकां सत्ता तिगोवन आशिल्ल्या नितीश कुमार हांकां ह्या वेळची वेंचणूक बरीच जड वतली अशेंच सगल्यांक दिसतालें. काँग्रेस आनी इश्ट पक्षांक खरें म्हणल्यार हीच संद आशिल्ली, पूण राहुल गांधी हांगाय व्हिलन थारले. राष्ट्रीय जनता दलाचे तेजस्वी यादव हांकांय तांची संगत नडली अशें दिसून आयलें. काँग्रेस जाल्यार बिहारांत फक्त वखदा खातीर उरल्या. हेंवूय ह्या निकालान दाखोवन दिलें. बिहारांत महागठबंधनाक आयिल्ल्या अनपेक्षीत आनी लजेक पडपी हारी उपरांत काँग्रेसीच्या राज्य संघटणांतूच न्हय जाल्यार केंद्रीय पांवड्यारूय अस्वस्थतायेची स्थिती निर्माण जाल्या. वेंचणूक रणनितीतली त्रुटी, गठबंधनांत योग्य ताळमेळाचो उणाव, तिकीट वांटपातली विसंगती आनी थळाव्या कार्यकर्त्यां कडेन तुटिल्ल्या नात्याक लागून खुबश्या वरिश्ठ फुडाऱ्यांनी काँग्रेसीच्या कामकाजाचेर सरळ बोट दवरलां. महागठबंधन खंय उणें पडलें हाची चर्चा चालू आसा. वेंचणुको कश्यो जिखप हें भाजपा कडल्यान शिकपाची वेळ तांचेर आयल्या. महागठबंधनाची बिहारांतली वेंचणूक मोहीम खुबश्या मुद्द्यांचेर आदारीत आशिल्ली. बेरोजगारी, म्हारगाय, समाजीक न्यायाची नवी व्याख्या आनी थळाव्या प्रस्नां वेलो असंतोष ह्या सगल्यांची पावती मेळटली अशी आस्त आशिल्ली. पूण निकालान दाखोवन दिलें की लोकांक हें सुत्र मना पसून पटिल्लें ना. हार म्हणल्यार फक्त संख्या न्हय, तो संदेश आसता. बिहारान दिल्लो संदेश असोच स्पश्ट आसा.
महागठबंधनाची ही मोटी उणीव म्हणल्यार प्रचारांतली कमकुवत समन्वय. राहुल गांधी राष्ट्रीय पांवड्यार वळखुपी वादग्रस्त पूण प्रभावशाली व्यक्तीमत्व. पूण बिहारा सारक्या राज्यांत, जंय जातीय रचना, प्रादेशीक फुडारपण आनी थळाव्या मुद्द्यांचो दबदबो सगल्यांत चड आसता. थंय राष्ट्रीय फुडारपणाचें आगमन निश्चीतपणान म्हत्वाचें आसता. हें आगमन वेळार आनी योग्य खरतायेन जावंक जाय आशिल्लें. पूण तशें जालें ना. तेजस्वी यादव हांचेर पुराय भार घालून राहुल गांधीची मोहीम कांय प्रमाणांत सिमीत दिसली. एनडीएची संघटणशक्ती आनी बुन्यादी राजकी यंत्रणा महागठबंधना खातीर खुबूच भारी पडिल्ल्याचें चित्र हे वेंचणुकेंत मुखेलपणान दिसून आयलें. महागठबंधनांत आशिल्ल्या पक्ष विचारांनी साम्य आसलें तरी रणनितीत भिन्न थारलो सुवातो वांटपा विशीं चलिल्लो दीर्घकाळ मतभेद, खंयच्या मुद्द्यांचेर कोण उलयत हाचो उणाव, आनी कांय म्हत्वाच्या वाठारांनी काँग्रेसीची उणी उपस्थिती हांणी आघाडेक सुरवाते सावनूच बचावात्मक भुमिकेंत धुकलून दिलें. राजकारणांत एकतर्फी फुडारपण चलना. पूण खूबशे आवाज आनी अस्पश्ट दिशा हांकांय मतदार पसंती दिनात. महागठबंधन हेच कात्रींत सांपडलें. हार ही खंयच्याच आघाडी खातीर अंत नासता. तो सुदारपाचो पयलो पांवडो आसता. महागठबंधनाचो फुडलो मार्ग आनिकूय खडतर जाला हें मान्य करचेंच पडटलें. महागठबंधनाच्या पुनरुत्थाना खातीर कांय मुळावे बदल अनिवार्य आसात. लोकां मुखार नेमकें कितें मांडप हे विशीं स्पश्टताय गरजेची आसा. फक्त सत्ताविरोध ही कार्यावळ लोकांक आकर्शीत करिनात हो धडो बिहारानूय दिला.
राष्ट्रीय लोकशाय आघाडीचें प्रबळ शस्त्र म्हणल्यार तांची संघटणशक्ती. महागठबंधनाची रचणूक अजूनय सदळ स्वरुपाची आसा. बूथ पांवड्यार यंत्रणांक घटाय दिवप आनी तरणाट्या फुडाऱ्यांक मुखार हाडप गरजेचें आसा. जातीय वेवस्थेचो प्रभाव आशिल्ल्या राज्यांत महागठबंधनान नवें आनी व्यापक समाजीक समिकरणां उबारपाची गरज आसा. तरणाट्यां मतदारांक आकर्शीत करप हेंवूय केंद्रस्थानी आसूंक जाय. ईव्हीएम विरोध आनी एसआयआर हे मुद्दे आतां चलचे नात हें बिहारानूय दाखोवन दिलां. बिहारची हार गंभीर आसाच, पूण महागठबंधनाची राष्ट्रीय प्रतिमा जिती दवरप गरजेची आसा. मोदी सरकारा आड आशिल्ल्या असंतोषाचे केंद्रबिंदू जर महागठबंधनान योग्य वेळार धरिल्ले जाल्यार येता त्या वेंचणुकांनी ते प्रभावी थारूंक शकतात. राजकारणांतले बदल ही दीर्घकालीन प्रक्रिया आसली तरी योग्य रणनिती, स्पश्ट फुडारपण आनी लोकां कडेन तुटिल्ली नाळ परतून जुळोवपाची तयारी आसत जाल्यार महागठबंधनाक नवी उभारी मेळूंक शकता. बिहारान महागठबंधनाक खर धक्को दिला. पूण हो धक्को निर्णायक ना. हारींतल्यान शिकपाची वृत्ती आसत जाल्यार बंगाल आनी हेर राज्यांनी महागठबंधन पुरायपणान उध्वस्त जावपा पसून आडावप शक्य आसा. राहुल गांधी आनी महागठबंधन आतां एका वेगळ्याच मोडणार उबे आसात. हार स्विकार करून पुनरुत्थानाचो मार्ग वेंचत जाल्यार तें फुडल्या राजकी समिकरणांत म्हत्वाचे खेळगडे थारतले. बिहार निकाला वेल्यान तितलो तरी बोध निश्चीतपणान घेवंक येतलो.
वामन प्रभू
9823196359
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
