भांगरभूंय | प्रतिनिधी
मुख्यमंत्रीः ही सुविधा फक्त पणजेंतल्या कचेऱ्यां खातीर
पणजी: चित्रपट महोत्सवाच्या उक्तावणा खातीर 20 नोव्हेंबराक पणजेंतल्या सरकारी कचेऱ्यांक दनपारां उपरांत सुटी आसतली. सर्वसादारण प्रशासन खात्यान (जीएडी) हे विशींचो आदेश जारी केला. दनपारां मेरेन सरकारी खातीं, म्हामंडळा, स्वायत्त संस्था उक्तीं आसतलीं. दनपारां उपरांत तांकां सुटी आसतली.
ही सुविधा फक्त पणजेंतल्या कचेऱ्यां खातीर आसतली. हेर सगल्या शारांतल्यो कचेऱ्याे दीसभर सुरू आसतल्यो. चित्रपट महोत्सवाच्या उक्तावणा वेळार पणजेंत चित्ररथ मिरवणूक जातली. चित्ररथ मिरवणुकेक लागून कर्मचाऱ्यांक कामाचेर आडखळ जावची न्हय म्हूण दनपारां उपरांत सुटी जाहीर केल्या.
चित्ररथ मिरवणुके उपरांत मनरिजवण संस्थेचे कचेरे मुखार उक्तावण सुवाळो जातलो. बऱ्याच वर्सां उपरांत चित्रपट महोत्सवाचो उक्तावण सुवाळो पणजेंत जातलो. सुरवेचीं कांय वर्सां सोडलीं जाल्यार फाटलीं खूबशीं वर्सां उक्तावण सुवाळो डॉ. श्यामाप्रसाद मुखर्जी स्टेडियमाचेर जातालो. अंदूं उक्तावण सुवाळो वेगळे तरेन करपाची सुचोवणी आयोजकां कडल्यान आयिल्ल्यान चित्ररथ मिरवणुकेन उक्तावण जातलें, अशें मुख्यमंत्री डॉ. प्रमोद सावंत हांणी सांगलें.
इतले मजगतीं, चित्रपट महोत्सवाची तयारी नेटान सुरू आसा. रोशणाय तशेंच पेंटिंगेचीं कामां सोंपपाचे वाटेर आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
