भांगरभूंय | प्रतिनिधी
भांगरभूंय । पत्रक
कुंडयः सैमाच्या नेमा प्रमाण हिंदू धर्माचें आचरण करपाक जाय. ऋशीमुनींकडल्यान संस्कृतीचें हें दायज चलंत आयलां. हे संस्कृती कडेन आयचे तरणाटे आकर्शीत जातात हे बरी गजाल आसा. हिंदूंक हिंदू म्हणून जगपाक मेळपाक जाय. ब्रह्मयज्ञ,देवयज्ञ,पितृयज्ञ,भूतयज्ञ, मनुष्ययज्ञ ह्या पंचमहायज्ञांचें आचरण करप हें हिंदूचें कर्तव्य आसा अशें स्वामी ब्रह्मेशानंद हांणी सांगलां.
कुंडय तपोभूमीत श्री दत्त पद्मनाभ पीठ आयोजीत श्रावणी विधी स्वामींच्या मार्गदर्शना खाला बिरेस्तार 11 ऑगस्टाक जाली. तेन्ना तांणी आपल्या आशिर्वचनांत आपल्या अनुयाईंक हो उपदेश केलो. दरेका हिंदून पंचमहायज्ञ करपाची गरज आसा. आपल्या गुरुंकडेन आध्यात्मीक गिन्यान मेळोवपाक येवप हीच खरी श्रावणी. ऋशीमुनींनी सुरू केल्ली ही विज्ञानाधिश्ठीत आध्यात्मीक परंपरा सगल्यांनी जपून दवोरपाची गरज आसा अशें तांणी सांगलें.
ह्या वेळार माचयेर फातोड्डें मतदारसंघाचो आमदार विजय सरदेसाय, मयेंचो आमदार प्रेमेंद्र शेट, सागर गोवेकार आनी हेर मानेस्त हाजीर आशिल्ले.
श्रावण विधींत गोंय, कर्नाटक आनी महाराष्ट्रांतले भाविक वांटेकार जाल्ले. यज्ञोपवीत धारण, हवन, तर्पण, मार्जन, सभादीपदान हे विधी ह्या वेळार जाले. आरती, पसायदान आनी म्हाप्रसादान कार्यावळीचो समारोप जालो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
