भांगरभूंय | प्रतिनिधी
पणजी : फाटले दाेन दीस गोंयांत शीं वाडलां. गांवगिऱ्या वाठारांत शिंयाची खरताय चड जाणवता. 24 वरांत पणजेंतलें उण्यांत उणें तापमान 1.5 अंशान उणें जावन 19 अंश सेल्सियस जालां. मुरगांवांतलें चडांत चड तापमान 19.6 अंश सेल्सियस उरलें. फुडले स दीस गोंयांतलें उण्यांत उणें तापमान 20 ते 21 अंश सेल्सियस मेरेन पावपाची शक्यताय आसा.
सद्या गोंयांत रातीं कडेन आनी फांतोडेर कुलकुल्याचें शीं पडटा. फांतोडेर कांय कडेन धुकें पडटा. सकाळीं शिंया सयत थंड वारो अणभवूंक मेळटा. अशें आसलें तरी दनपारां उपरांत वताची खरताय वाडत आसा. सोमारा पणजेंत चडांत चड तापमान 32.9 अंश जाल्यार मुगगांवां 33 अंश सेल्सियस तापमानाची नोंद जाली. फुडले स दीस गोंयांतलें चडांत चड तापमान 32 ते 33 अंश सेल्सियस मजगतीं उरतलें.
फाटल्या कांय वर्सांत गोंयांत नोव्हेंबर म्हयन्याचे अखेरेक जाल्यार डिसेंबर म्हयन्याच्या पयल्या सप्तकांत शिंयाची खरताय वाडत आसा. पूण जानेवारी म्हयन्या उपरांत शीं उणें जायत आसा. हाचे आदीं हवामान खात्यान नोव्हेंबर म्हयन्यांत गोंयांतलें चडांत चड तापमान सरासरी परस उणें जाल्यार उण्यांत उणें तापमान सरासरी परस चड उरपाची शक्यताय उक्तायिल्ली. अशें आसलें तरी फाटल्या कांय दिसांनी उण्यांत उणें तापमान सरासरी परस 1.5 ते 2 अंशान उणें जायत आसा.
हवामान खात्यान मध्य प्रदेश, महाराष्ट्र, राजस्थान हांगासरल्या कांय वाठारांनी शिंयाचें ल्हार येवपाची शक्यताय उक्तायल्या. पूण गोंयांत अशा ल्हारेची शक्यताय ना. सोमारा मध्य प्रदेश, तेलंगणा हांगासरल्या कांय वाठारांनी चडांत चड तापमान सामान्य उण्यांत उण्या तापमाना परस 3.1 ते 5 अंश सेल्सियस परस उणें जाल्लें. खात्यान 18 ते 21 नोव्हेंबर मजगतीं तामीळनाडू तशेंच केरळच्या कांय वाठारांनी जोगलां सयत मध्यम स्वरुपाच्या पावसाची शक्यताय उक्तायल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
