भांगरभूंय | प्रतिनिधी
कृष्णा साळकार : रेल्वे अंडरपासाच्या कामाक सुरवात
भांगरभूंय । प्रतिनिधी
मुरगांव : आपल्या मतदारांची सुरक्षा आनी सुविधा सुनिश्चीत करप हाका प्राधान्य दिलां, अशें वास्कोचे आमदार कृष्णा साळकार हांणी सांगलें.
वास्को रेल्वे अंडरपास आनी रस्तो रुंदीकरण प्रकल्पाचें उक्तावण केले उपरांत साळकार उलयताले.
अंडरपासाक लागून सुमार 50 वर्सां सावन पडून आशिल्ली मागणी पुराय जातली. रेल्वे मार्गा मुखार आशिल्ल्या रस्त्याचें रुंदीकरण करपाचें काम हाचे आदींच सुरू जालां. ह्या कामां खातीर वास्को मांगोरहील रस्तो फुडलो कांय दीस बंद आसतलो. वास्को शारांतल्या मांगोरहील रस्त्या वयल्या रेल्वे पुलाची उंचाय उणी आशिल्ल्यान ह्या पुलाक जोडुनूच रेल्वे मार्गा पोंदां दुसरो पूल बांदतात ते खातीर पुला पोंदच्यान व्हड गाडयांक येरादारी करप शक्य जातलें. दोन वर्सां आदीं ह्या प्रकल्पाचें नियोजन केल्लें, अखेर आयज म्हूर्त मेळ्ळो. दुसऱ्या पुलाच्या निमतान थंयचो रस्तो रूंद करपाचें काम हातांत घेतलां. ओरूलेचे वटेन आशिल्ल्या मैदानाक जोडून रस्तो रुंदीकरणाचें काम सुरू जालां. शाराचे दिशेन रेल्वे कम्युनिटी हॉला भायले जमनीर रस्तो रूंद जातलो. मजगतीं, हीं दोनूय कामां वांगडाच सुरू जाल्यात. रस्त्याचेर व्हड यंत्रसामुग्री आनी ट्रक उबे केल्यात. हीं कामां झुजां पांवड्यार करतले. हे खातीर पुला पोंदच्यान वचपी वास्को ते मांगोरहील रस्तो फुडले कांय दीस येरादारी खातीर बंद दवरतले, अशें साळकार हांणी सांगलें. भुंयारी मार्ग नाशिल्ल्यान लोकांक खूब त्रास जाताले. उजो पालोवपी दळाच्या बंबा सयत आपत्कालीन गाडयांक खूब खेपे वेळार पावपाक अडचण येताली. हो रस्तो बंद दवरपाचे आशिल्ल्यान प्रवाश्यां खातीर पर्यायी रस्त्याची वेवस्था करतले, अशेंय साळकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
