भांगरभूंय | प्रतिनिधी
वास्को: चिखले पंचायत सिग्नला लागसारा सोमारा सकाळीं एके दुचाकीक अचकीत उजो लागिल्ल्यान ह्या वाठारांत कांय काळ बरोच बोवाळ निर्माण जालो. हे घडणुकेक लागून व्यस्त रस्त्यावेली येरादारी कांय प्रमाणात मंद जाल्ली. हे घडणुकेंत कोणाक कांय जावंक ना. चालक वाटवलो. मात ताची दुचाकी पुरायेन लासून गोबोर जाली.
हे विशीं प्रत्यक्षदर्शींनी दिल्ले म्हायती प्रमाण, दुचाकींतल्यान अचकीत धुंवर येवपाक लागलो आनी ताचे उपरांत उजो पेटपाक लागलो. ह्या वाठारांतल्या नागरिकांनी बेगोबेग उजो पालोवपी दळाक हाची म्हायती दिली. तो मेरेन दुचाकी लासून गोबोर जाल्ली.येरादारी पुलिसांनी उजो पालोवपाचे प्रक्रिये मजगतीं रस्त्यावेले येरादारीचें नियमन केलें, हाका लागून वाहनांची व्हड कोयंडी जावंक ना. हे घडणुकेंत कोणाक कांय जावंक ना.
उजो लागिल्ल्याचें नेमकें कारण आजूनय स्पश्ट जावंक ना. यांत्रिकी इबाड, अती उश्णताय वा शॉर्ट सर्किटाक लागन हो उजो लागला आसतलो, असो मुळावो अदमास अधिकार्यांनी उक्तायलो. अधिकार्यांनी वाहन धनयांक अश्यो घडणुको जावच्यो न्हय म्हूण आपापल्या वाहनांचो नेमान सांबाळ करपाची मागणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
