भांगरभूंय | प्रतिनिधी
सुकाणू समितीचे बसकेंत जिल्लो पंचायत वेंचणुकेचेर चर्चा
पणजी : जिल्लो पंचायत वेंचणुकेंत भारतीय जनता पक्षाची म्हजें घर येवजण आनी सरकारान केल्ले उदरगतीचेर भर आसतली. वेंचणुकेची सवीस्तर कार्यावळ जाहीर जातकीर उमेदवारांची घोशणा जातली. पक्षाचे सुकाणू समितीचे बसकेंत जिल्लो पंचायत वेंचणुकेचो प्रचार आनी रणनितीचेर विचार जालो, अशी म्हायती गोपानी दिली.
राज्यांत १३ डिसेंबराक जिल्लो पंचायत वेंचणूक जातली. खयच्याच खीणाक आचारसंहिता लागू जावपाची आशिल्ल्यान भारतीय जनता पक्षान वेंचणुकेची तयारी सुरू केल्या. मुख्यमंत्री डॉ. प्रमोद सावंत आनी प्रदेश भाजप अध्यक्ष दामू नायक हांच्या फुडारपणा खाला सुकाणू समितीची बसका जाली. हे बसकेक सिद्धार्थ कुंकळ्येंकार, भौशीक बांदकाम खात्याचे मंत्री दिगंबर कामत, चंद्रकांत कवळेंकार, पंचायत मंत्री मॉवीन गुदिन्हो, खासदार सदानंद शेट तानावडे, खेळा मंत्री रमेश तवडकार, आदले खासदार विनय तेंडुलकार हाजीर आशिल्ले.
जिल्लो पंचायतीची आचारसंहिता लागू जाली काय पक्षाचे उमेदवार जाहीर जातले. प्रचार तशेंच रणनितीचेर बसकेंत चर्चा जाली. मंत्री, आमदार, पदाधिकारी पुराय राज्यांत प्रचार करतले, अशी म्हायती सुकाणू समितीचे वांगडी सिद्धार्थ कुंकळ्येकार हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
