भांगरभूंय | प्रतिनिधी
पणजी : पत्रकारांनी राज्य सरकाराच्या चुकीच्या गजालींचेर नक्की बरोवचें. गोंयची प्रतिमा आमकां सगळ्यां खातीरूच खूब म्हत्वाची आसा हें लक्षांत घेवप गरजेचें. पत्रकारां सयत सगल्यांनीच राज्याची प्रतिमा राखपा खातीर कायम यत्न करचे, अशें मुख्यमंत्री डॉ. प्रमोद सावंत हांणी सांगलें. सोमारा राष्ट्रीय पत्रकार दिसा निमतान आयोजीत कार्यावळींत ते उलयताले. ह्या वेळार म्हायती आनी प्रसारण खात्याचे संचालक दीपक बांदेकार, सचीव एस एस गिल , पत्रकार संघटनेचे अध्यक्ष राजतिलक नायक आनी हेर हाजीर आशिल्ले.
ह्या वेळार मुख्यमंत्र्यान म्हणलें, माध्यमां हीं लोकशायेचो चवथो स्तंभ. तो घटमूट करपाचें काम पत्रकारांचें. सध्या सत समाजा मुखार हाडप ही काळाची गरज आसा. सत सामकार आयलें ना जाल्यार खूब व्हड समस्या निर्माण जावपाक शकता. म्हाका स्वताक हाका लागून बरेच त्रास सोंसचे पडल्यात. हाका लागून माध्यमां सत्या खातीर काम करतलें ही अपेक्षा आसा. माध्यमांनी बातमी दितना कितें खरें, कितें फट हें पयलीं खोलायेन तपासचें, दोनूय वटांनी विचार करचो, संबंदितां कडेन उलोवचें आनी मागीरूच बातमी करची. सरकाराच्या चुकीच्या प्रत्येक गजालींचेर बरोवन हो पत्रकारांचो अधिकार.
राज्य सरकारान फाटलीं स वर्सां पूर्णवेळ पत्रकारां खातीर विवीध येवजण्यो सुरू केल्यात. ईव्ही बायक येवजणे खातीर अर्थसंकल्पीय तरतूद केल्या. लॅपटॉप आनी कॅमेरा येवजणूय चालू आसा. निवृत्ती वेतन येवजणेंतूय बदल केल्यात. मुखारुय जातले. डिजिटल माध्यमांच्या नोंदणी प्रक्रिये विशीं पत्रकार संघटणांनी म्हायती आनी प्रसारण खात्याक सुचवण्यो करच्यो. सरकार सदांच पत्रकार संघटणां वांगडा रावतलें. बायलां आधारीत उदरगतूय सध्याच्या काळाची गरज जावन आसा, अशें मुख्यमंत्र्यांनी सांगलें.
पत्रकारांचो भोवमान
ह्या वेळार ज्येश्ठ व्यंगचित्रकार आलेक्स फर्नांडीस उर्फ आलेक्सी हांचो एक लाख रुपया, मानपत्र, यादस्तीक अशा स्वरुपाचो जीणेगौरव पुरस्कार भेटोवन भोवमान केलो. तशेंच जॉयल आफोन्सो, नंदेश कांबळी, अतुल पंडित, बबन भगत, जय नायक हांचो पत्रकारिता मळाचेर २५ वर्सां पुराय केल्ले खातीर भोवमान केलो. समीप नार्वेंकार, अजय बुवा, रमणदीप कौर, विभा वर्मा, मार्कुस मुर्गुल्यांव, गौरी मळकर्णेकार, राजतिलक नायक, क्रिस्तीन माशादो आनी पांडुरंग गांवकार हांकां उत्कृश्ट बातमी, संपादक पुरस्कार भेटयले.
ह्या वेळार फोटोग्राफी सर्तीचेय पुरस्कार भेटयले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
