भांगरभूंय | प्रतिनिधी
21 व्या शेंकड्यांतलो शिक्षक हो विजनरी फुडारी आनी दृश्टीकोन फुडार पळोवपी आसूंक जाय.
सध्याच्या 21 व्या शेंकड्यांत गरजेचीं कसबां आनी कुशळटायो शिक्षकांचे लागीं आसूंक फावो. तेच वरीं शिक्षकांनी फुडारा विशीं आशावादी आनी आजीवन शिकपी विद्यार्थी आसूंक जाय. शिक्षणीक तंत्रगिन्यानांत सदांच बदलपी प्रवृत्तींची शिक्षकांक जाणविकाय आसूंक जाय. फुडारांत विद्यार्थांक मेळपी तांच्या करियर संदीचें तांकां गिन्यान आसूंक फावो. 21 व्या शेंकड्यांतलो शिक्षक हो विजनरी फुडारी आनी दृश्टीकोन फुडार पळोवपी आसूंक जाय. विद्यार्थ्यांच्या फायद्या खातीर शिक्षणांतल्या सगळ्या भागधारकां कडेन सहकार्य करपाक ताणें तयार रावंक जाय.
अनुकुलताय
अनुकूलताय म्हणल्यार अडेप्टेबिलिटी. हिका लागून शिक्षकांक निरशे नासतना अनपेक्षीत परिस्थिती हाताळपाक मेळटा. शिक्षकांनी शिक्षणीक बदलांक वेंग मारप गरजेची. तशेंच उगतें मनान आपले मदीं बदल घडोवंक जाय, म्हणल्यारूच आपणें शिटूक रावन शिकूंक जाय. विद्यार्थांनी साध्य करपा सारकीं ध्येयां कशीं थारावचीं? हें शिकल्यार तांकां कुशळटाय मेळूंक शकता. तशेंच वेग वेगळ्या शिकपाचे पद्दतीक तशेंच शिकोवपाचे शैलींत बदल करपाक मेळपाक जाय.
अभिनव
इनवैटीक म्हणल्यार अभिनव. आधुनीक शिक्षक नव्या शिक्षणीक अॅप्लिकेशनां पसून तंत्रां शिकयतना तशेंच इलॅक्ट्रॉनीक साधनां मेरेन नव्या अणभवांनी शिक्षित आसूंक जाय. अभिनव जावप म्हणल्यार वास्तव जगाचे लागीं संबंद जोडप आनी विद्यार्थां मदीं सृजनशील मानसिकता वाडोवप. तातूंतल्यान विद्यार्थ्यांक जोखीम घेवपाक आनी एकठांय काम करपाक शिकपाक उर्बा मेळटलीं.
विद्यार्थ्यांक अधिकार दिवप
आयच्या विद्यार्थांक सशक्त करपाची तांक, चिकित्सक करप विचार करूंक लावप, नवनिर्माण करपी, भावूक आनी अनुकूल जावन प्रेरणा दिवपाक शिक्षक जाय. तेच भशेन विद्यार्थ्यांचीं समस्या सोडोवपाची शिक्षकांनी तांक दिवंक जाय. शाळेंत तशेंच वास्तव जिणेंत येस मेळोवपाक जाय आशिल्लीं, साधनां विद्यार्थ्यांक उपलब्ध करूंक जाय. तांकां एम्पाॅवर करपाक जाय.
सृजनशील
आधुनीक काळांतले शिक्षक सृजनशील आसूंक जाय. जेन्ना धडे निरस (मोनोटनस) जातात, तेन्ना शिक्षकांनी नवे पद्दतीचो उपेग करचो पडटा. हाका लागून धडे चड आनंदी आनी खोसदीणें जावंक पावतले. विद्यार्थ्यांनी जें शिकलां तें याद दवरपाक मजत जातलें. तांणी अभ्यासाचे विशय दिसपट्ट्या जिणे कडेन जोडचे. शिक्षकांनी आपल्या विद्यार्थ्यांची सुजनशीलताय वाडोवपाक जाय.
विश्वास
दरेक शिक्षकांनी फकत स्वताचेर न्हय तर आपल्या वांगड्याचेरूय विश्वास दवरूंक जाय. आत्मविश्वासान भरिल्लो शिक्षक, विद्यार्थी आनी हेरांक आत्मविश्वासी दवरपाक प्रोत्साहान दिता. हाचो भान दरेका शिक्षकाक आसूंक जाय. जाचो परिणाम सगळे देसाचे बरे नागरीक जावंक पावतले. आत्मविश्वास आशिल्लो शिक्षक आपल्या विद्यार्थ्यांच्या वृत्तीचेर, समाजीक – भावनात्मक वाड आनी येसस्वीपणाचेर परिणाम करता.
शिक्षक सदांच विद्यार्थी
शिक्षण हो आजीवन शिक्षक. संवसार हो खिणा – खिणांत बदलत आसता. तेच भशेन अभ्यासक्रम आनी शिक्षणीक तंत्रगिन्यान झपाट्यान बदलता. चडांत – चड मैल वचपाक तयार आशिल्लो शिक्षक सदांच जिणेंत यशस्वी आनी प्रभावी शिक्षक थरता. सतत संशोधन करून ऑनसायन आनी ऑफलायन दोनूय नवी साम्रगी, विशय वाचून आनी हेर गजाली सैत कार्यशाळा अभ्यासक्रम, परिसंवाद हाजीर रावून ही मोख गाठूं करूं येता. शिक्षकान सदांच आपूण विद्यार्थीच आसा म्हणपाची भावना मनांत दवरून शिकूंक जाय.
निर्णयक्षमता
शिक्षकां विशीं समजांत एक विचित्र अविश्वास आसा. जशें ते भुरग्यांक शिकोवपाक असमर्थ आसात. तेच परीं आपली जापसालदारकी पुराय करपाक असमर्थ आसात. जेन्ना – जेन्ना स्वतंत्र निर्णय घेवपाचो प्रस्न तांचेर पडटा. तेन्ना – तेन्ना समाजा भितरल्यान दुबावाचे आवाज उदेंतात. शिक्षक स्वता निर्णय घेवपाक असमर्थ आसतात. आनी ते फकत सुचोवण्या प्रमाण मर्यादीत आसूंक जाय अशी धारणा निर्माण जाल्या. शिक्षकांक वर्गांत योग्य निर्णय घेवंक मेळना अशें मानल्यार तांचो आत्मविश्वास उणो जाताच, पूण शिक्षण शास्त्राच्या मुळाव्या तत्वांचेर आडनदर जाता. शिक्षक विद्यार्थ्यां खातीर सगल्यांत बरो निर्णय घेवंक शकना असो समज जाला. तशेंच पळयल्यार हो शिक्षणशास्त्राच्या तत्वांचें सारकेंच उल्लंघन म्हणल्यार जाता. शिकोवप ही एक सृजनशील कला, लवचीक प्रक्रिया आसून ती विद्यार्थ्यांच्या वैयक्तीक गरजे प्रमाणें आनी आवडी प्रमाणें जुळोवंक जाय असो शिक्षणशास्त्रांत भर दिला. शिक्षकांक तांच्या वर्गांत निर्णय घेवपाचें मेकळीक मेळ्ळीं जाल्यार विद्यार्थ्यां खातीर शिकपाचें बरेंच वातावरण तयार करूं येता.
भुरग्यांचे विशिश्ट गरजे प्रमाण शिकोवपाची साम्रगी वेंचप. आनी शिकपाच्यो पद्दती अनुकूल करप ही शिक्षकाची म्हत्वाची जापसालदारकी. पूण शिक्षकांक दुबाव येता, तेन्ना तांकां फकत सुचोवण्यो पाळपाक लायतात. जाका लागून तांच्या निर्णय घेवपाच्या क्षमतेक आडमेळीं येतात. तरीय जीं विद्यालयां शिक्षकांक स्वतंत्रपणान निर्णय घेवपाची मेकळीक दितात. त्या विद्यालयांची वा शिक्षणीक संस्थांची भरभराट जाल्या बगर रावना.
संवाद कसब
बऱ्या शिक्षकाची सगळ्यांत म्हत्वाची कुशळटाय म्हणल्यार संवाद कसब. विद्यार्थ्या कडेन प्रभावीपणान संवाद सादल्यार सकारात्मक शिकपाचें वातावरण तयार जाता. विद्यार्थ्यांच्या येसस्वीपणाक चालना मेळटा. तशेंच बरे संवाद कसब शिक्षक, विद्यार्थी, पालक आनी सांगात्यां कडेन बरे संबंद तयार करपाक सक्षम करता. शिक्षकांचे पासत बरे संवादांचीं 7 कारणां अशीं आसात. बरे संवाद विद्यार्थ्यांचेर नियंत्रण दवरतात. शिक्षक आनी विद्यार्थ्यां मदीं बरें नातें जुळटा. विद्यार्थ्यांचे शिक्षण सुदारता. शिक्षकांच्यो समस्या आनी प्रस्न वळखुवपाक मजत जाता. खास गरजेवंत विद्यार्थ्यांक संगोपनांत मजत करता. शिक्षका विशीं पालक आनी विद्यार्थ्यांच्या धारणांचेर परिणाम करता.
सोंपयतना…
राश्ट्रीय शिक्षण धोरण (एनर्इपी), 2020 म्हत्वांच्यो तीन जागतीक आव्हानांक मान्यताय दिता, जांकां शिक्षणीक प्रतिसाद दिवपाची गरज आसा. पयलें , मशीन लर्नींग, बीग डेटा आनी जनरेटिव्ह आर्टिफिशुयल इंटेलिजन्स (एआय) ह्या उदयाक येवपी तंत्रज्ञानाक लागून फुडल्या कामाच्या वातावरणांत (कामबळ) अनुकूल (कशें शिकप) आनी उच्च पातळेचेर कुशळटायेची गरज निर्माण जाल्या. दुसरें हवामान बदल, सैमीक संपत्ती उणी करप आनी प्रदुशणाक लागून निर्माण जावपी पर्यावरणीय आव्हानांक लागून संवसारांतली अन्न, उदक, उर्जा आनी नितळसाण हांची गरज भागोवपा खातीर अभिनय आनी टिकावू उपाय सोदून काडपाची गरज आसा. तिसरें, नवे रोग, म्हामारी आनी संसर्गजन्य रोगांचो धोको वाडत आशिल्ल्यान वैजकी संशोधन आनी अर्थीक बळग्याची गरज निर्माण जाल्या. ह्या आव्हानांक तोंड दिवपा खातीर , एनपीन सुरवातीच्या पावंड्यार कुशळटाय आदारीत शिक्षणाक प्राधान्य दिता, जें आंतर विधा पद्दतीचो वापर करून सिध्दांतीक वर्गांतल्या गिन्यानाचो वेव्हारीक उपेग वांगडा जोडटा.
विशाल सिनाय खांडेपारकार
8080622370
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
