भांगरभूंय | प्रतिनिधी
श्रीपाद नायक : नार्व्यां गंगा आरती घाटा खातीर बुन्यादी फातर
भांगरभूंय । प्रतिनिधी
दिवचल : देवभूंय गोमंत भुयेंत अध्यात्मीक पर्यटनाक चालना दितना गंगा आरती वांगडा वेगवेगळे प्रकल्प चालीक लायिल्ल्यान पर्यटकांक वेगळी अणभुती मेळटली. अध्यात्माक लागून मनशाक मनशांती मेळटा. ते कातीर गोंयांतल्या पर्यटनाक वेगळो चंवर फुट्टलो. नार्वेंचो प्रकल्प संवसारीक पांवड्याचेर आदर्श थारतलो, अशें केंद्रीय मंत्री श्रीपाद नायक हांणी सांगलें.
नार्वेंच्या पंचगंगेचे देगेर गोमंत सरिता दर्शन हो सुमार साडे धा कोटी रुपया खर्च करून निर्माण जावपी गंगा घाट आरती प्रकल्पा खातीर बुन्यादी फातर मंत्री नायक हांचे हस्तुकीं बरयलो. त्या वेळार ते उलयताले.
ह्या वेळार राज्यसभा खासदार सदानंद शेट तानावडे, पर्यटन मंत्री रोहन खंवटे, आमदार प्रेमेंद्र शेट, आमदार डॉ. चंद्रकांत शेट्ये, जिल्हो पंचायत वांगडी महेश सावंत, नार्वेंचे सरपंच सिद्धेश पार्सेकार, मुख्य अभियंतो प्रमोद बदामी आनी हेर मानेस्त हाजीर आशिल्ले.
फक्त दर्या पर्याटनाचेर अवलंबून रावनासतना गोंयांत आसिल्ल्या प्राचीन आनी इतिहासीक देवळांक उजवाडांत हाडून अध्यात्मीक पर्यटनाक चालना दिवचे खातीर तशेंच चड करून दिवचल म्हालांत पर्यटन खात्या वतीन पर्यटन सर्कीट केलां. नार्वेंचो गोमंत सरिता दर्शन हो प्रकल्प गंगा आरतीचे धरतेचेर दर्श प्रकल्प थारतलो. ताका लागून ह्या वाठारांत पर्यटकांचे वाडी वांगडाच गांवांतल्यो लोकांक रोजगाराची संद मेळटली, अशें मंत्री रोहन खंवटे हांणी सांगलें.
‘गोवा बी ऑन बिचीस’ संकल्पनेंतल्यान आध्यात्मीक पर्यटन गोंयच्या सांस्कृतीक दायजाक चालना दितलें आनी हेर नाविन्यपूर्ण उपक्रम आंखून सांवसारीक पर्यटकांचें आकर्शण करपाचो निश्चेव केला, अशें मंत्री खंवटे हांणी सांगलें.
खासदार सदानंद शेट तानावडे हांणी सांगलें, गोंयाक व्हड सांस्कृतीक प्राचीन परंपरा आसा. गोंयचीं देवळां संवसारीक पर्यटकांक भुरळ घालतात. नार्वेंचो प्रकल्प खऱ्या अर्थान अध्यात्मीक पर्यटनाक व्हड चालना दिलपी थारतलो.
आमदार डॉ. शेट्ये हांणी सांगलें, दिवचले इंटरलॅण्ड पर्यटनाक चालना दिवची अशी आपणें मागणी केल्या. खूबशे प्रकल्प म्हालांत चालीक लागतात. तातूंत दिवचले आनीक एक दर्जेगार प्रकल्प निर्माण जातलो.
आमदार प्रेमेंद्र शेट हांणी सांगलें, गंगा घाट आरती हो प्रकल्प आमचे खातीर व्हड देणें आसा. ते खातीर नार्वें गांवची निवड केल्ले खातीर पर्यटन मंत्री आनी मुख्यमंत्र्यांचे उपकार. पर्यटनाच्या माध्यमांतल्यान स्वयंरोजगाराक लेगीत चालना दिवप हो आमचो निश्चेव आसा. दीपक नार्वेंकार हांणी सुत्रसंचालन केलें. ह्या वेळार पंचगंगेचे देगेर मानेस्तां हस्तुकीं पुजा जाली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
