भांगरभूंय | प्रतिनिधी
पणजी : राज्यांत उद्देजकतेचें प्रशिक्षण दिवन नवनिर्मिती आनी उद्देजकतेचें वातावरण तयार करपा खातीर सरकारान मुख्यमंत्री स्वयं रोजगार येवजण सुरू केल्या. प्रशिक्षणाची पयली कार्यशाळा २६ ते २९ नोव्हेंबर मजगतीं जातली. कार्यशाळे खातीर ७५० रुपया शुल्क आसा. विद्यार्थी, शिक्षकां खातीर ती फुकट आसतली.
ईडीसी वरवीं हे येवजणेची कार्यवाही करतले. २०३० मेरेन स्टार्ट अप आनी उद्देगां खातीर पुश्टीक वातावरण, सुविधा उबारपाचें उद्धीश्ट आसा, अशी म्हयती ईडीसीच्या अधिकार्यांनी दिली. आयटीआय, पॉलीटेक्नीक आनी हेर महाविद्यालयांतल्या प्राध्यापकांक उद्देजकताये विशीं प्रशिक्षण दितले. हांगा प्रशिक्षण घेतिल्ले प्राध्यापक आपआपल्या महाविद्यालयांत विद्यार्थ्यांक प्रशिक्षण दितले. उद्देग खात्यान येवजण राबयिल्ल्यान कार्यवाही ईडीसी वरवीं जातली. एंट्रेप्रेनरशिप डेवेलोपमेंट इन्स्टीट्यूट ऑफ इंडिया (ईडीआयआय) वरवीं प्रशिक्षण दितले. ईडीआयआयच्या अहमदाबादांत तज्ज्ञ मार्गदर्शन करतले.
वसारक ३०० जाणांक हें प्रशिक्षण दितले. स्टार्ट अप्स आनी इन्कुबेशन सेंटरची म्हायती दितले. उपरांत ६ म्हयने ते १ वर्सा मेरेन अदीं मदीं कार्यशाळा तशेंच प्रशिक्षण शिबीरां जातलीं.
शिक्षण खातें, तांत्रीक शिक्षण संचालनालय, उच्च शिक्षण संचालनालय, कुशलता विकास संचालनालयाच्या सहकार्यान येवजण राबयतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
