भांगरभूंय | प्रतिनिधी
नवी दिल्ली, खबरां संस्था: तुमचे कडेन चार चाकी गाडी आसा आनी तुमी लांब प्रवास करतात जाल्यार ही बातमी तुमचे खातीर. १५ नोव्हेंबर सावन केंद्र सरकारान राष्ट्रीय म्हामार्गांचेर टोल वसुलीच्या नेमांत म्हत्वाचो बदल केला. हो बदल कितें? ताचो तुमचेर कसो परिणाम जातलो? हें सविस्तरपणान जाणून घेयात.
नवो बदल कितें?
नव्या बदला प्रमाण फास्टटॅग नाशिल्ल्या वा मोडिल्ल्या वाह वेगळे तरेन दंड भरचो पडटलो. येरादारीची गर्दी उणी करपा खातीर आनी डिजिटल वेव्हाराक चालना दिवपा खातीर हो बदल केला. आतां FASTag लेनांत प्रवेश करपी ड्रायव्हरांक आपली फारीकणी पद्दत जतनायेन वेंचची पडटली, नाजाल्यार तांकां अतिरिक्त रक्कम भरची पडूं येता.
रोख फारीकणीचेर दुपेटीन दंड
तुमच्या वाहनांत FASTag ना वा तें स्कॅन केल्लें ना आनी ड्रायव्हर रोख फारीक करता जाल्यार मागीर तुमकां सामान्य टोला परस दुप्पट टोल फारीक करचो पडटलो. देखीक टोल १०० रुपया आसल्यार २०० रुपया रोख फारीक करचे पडटले. २००८ वर्साच्या हायवे टोल संरचनेंत दुरुस्ती करून हो नेम चालीक लायला. हाका लागून लोकांक रोख वेव्हार टाळपाक आनी डिजिटल पर्यायाचेर वचपाक उर्बा मेळटली.
डिजिटल फारीकणीचेर सवलत
फास्टॅग काम करिना जाल्यार युपीआय, कार्ड वा हेर डिजिटल माध्यमान पेमेंट केल्यार फकत १.२५ पट टोल भरचो पडटलो. म्हळ्यार १०० रुपया टोला खातीर ड्रायव्हरांक फकत १२५ रुपया फारीक करचे पडटले, हो पर्याय वेंचल्यार ड्रायव्हरांक व्हडली सुटका मेळटली आनी रोख पयशांच्या तुळेंत अर्द्या परस उणो खर्च येतलो. डिजिटल इंडिया मोहीम घटमूट करप आनी पारदर्शकता वाडोवप हो सरकाराचो हेत आसा.
टोल प्लाझावेले फायदे
नव्या नेमांक लागून टोल प्लाझांचेर लांब रांक उणी जातली, कारण डिजिटल फारीकणी बेगीन आनी सोपी आसा. वाहनांचो वेग वाडटलो, इंधन आनी वेळ वाचतलें. रोख हाताळणीक लागून जावपी चुको उण्यो जातल्यो. तंत्रीक अपेस वा FASTag कालबाह्य जाल्यार लेगीत डिजिटल पर्याय दंडाचे भार उणो करतलो.
ड्रायव्हरां खातीर सल्लो
हायवेचेर सेगीत प्रवास करपी लोकांनी FASTag सक्रिय दवरचो आनी शिल्लक तपासचो. अपेस आयल्यार, रोखडेंच डिजिटल फारीकणीची निवड करात. ह्या बदलाक लागून हायवे वेवस्था चड कार्यक्षम आनी आधुनीक जातली. पूण हाचे कडेन दुर्लक्ष केल्यार तुमकां अर्थीक लुकसाण जावंक शकता हें लक्षांत दवरात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
