हरवळें पर्यटन केंद्र संवसारीक आकर्शण थारतलेंः मुख्यमंत्री

भांगरभूंय | प्रतिनिधी

20 कोटींच्या प्रकल्पांचो बुन्यादी फातर मुख्यमंत्र्या हस्तुकीं घालो

दिवचलः सैमीक सोबीतकायेन नटिल्ल्या गोंयची वळख संवसारीक पांवड्यार एक पर्यटन थळ महूण जाल्या. आतां डबल इंजिन सरकारान आध्यात्मिक पर्यटन, गांवगिरे पर्यटन, होम स्टे आनी हेर माध्यमांतल्यान पर्यटकांक आकर्शीत करतना गांवगिऱ्या गोंयच्या लोकांक स्वयंपूर्ण करपाचे दिकेन वचपाक सुरवात केल्या. केंद्र आनी राज्य सरकारांच्या सहकार्यान जायते महत्वाकांक्षी प्रकल्प हातांत घेतल्यात.
फाटल्या पन्नास वर्सांत जे शक्य जाले ना तें ह्या धा वर्सांत डबल इंजिन सरकारान साध्य करून दरेका हाताक काम दिवपाक स्वयंपूर्ण आत्मनिर्भर गोंयचें सपन साकार करपाचेर लक्ष केंद्रीत केलां अशें मुख्यमंत्री डॉ. प्रमोद सावंत हांणी हरवळ्यां- सांखळे सांगलें.
केंद्र सरकाराच्या आनी राज्य सरकार हांच्या पर्यटन खात्याच्या सहकार्यान सुमार 20 कोटी रुपयांच्या खर्चान हरवळेंचे श्री रुद्रेश्वर देवस्थान आनी हरवळें घसघसो वाठाराचे नुतनीकरण जातले. ह्या प्रकल्पाचो बुन्यादी फातर आनी पूजन डॉ. सावंत हांचे हस्तुकीं जालें.

खेळ, भलायकी, शिक्षण ह्या मळार महत्वाकांक्षी येवजण तयार करून राज्य सरकारान पर्यटकांक आकर्शीत करपाक येस मेळयलां. हाका लागून गोंयांत जायत्यो संवसारीक पांवड्यावयल्यो खेळां सर्ती जातात. पर्यटनांतल्यान रोजगाराची संद मेळपाक लागल्या.
आधुनीक उदरगती उपरांत ह्या पर्यटन थळार फुलां विकपी आनी ल्हान दुकानां उबारून थळाव्या लोकांक रोजगाराची संद दिवपाची येवजण आसा. तशेंच हे सुवातेवयलो आकर्शक घसघसो पुराय वर्सभर व्हांवत उरतलो हे खातीर आमचे यत्न आसात अशेंय मुख्यमंत्र्यान स्पश्ट केलें. सांखळेच्या पुर्विल्ल्या किल्ल्याचें सोबीतकाय बेगीन पुराय जातलें आनी तेंय एक वेगळें आकर्शण जातलें.

मुख्यमंत्री डॉ. सावंत, सुलक्षणा सावंत हांच्या हस्तुकीं बुन्यादी फातर घालप आनी नांव फलक उक्तावण सुवाळो जालो. ह्या वेळार खासदार सदानंद तानावडे, केंद्रीय मंत्री श्रीपाद नायक, पर्यटन मंत्री रोहन खंवटे, प्रेमेंद्र शेच, दामू नायक, केदार नायक, दयानंद मांद्रेकार, यशवंत मांडकार, दयानंद बोर्येकार, रितेश नायक, प्रमोद बदामी तशेंच हेर हाजीर आशिल्ले.