भांगरभूंय | प्रतिनिधी
पणजीः गोंय वीज खात्यान कार्यकारी अभियंतो काशीनाथ शेट्ये हांच्या फुडारपणा खाला सांताक्रूझ वाठारांत वीज खांब्यांचेर लोंबकळपी इंटरनेट केबल सेवा पुरवणदारांची केबल कापपाची मोहीम चड खर केल्या. वेगवेगळ्या सेवा पुरवणदारांकडल्यान बऱ्याच काळासावन आशिल्ली थकीत थकबाकी वसूल करप आनी नागरिकांची सुरक्षीतताय सुनिश्चीत करप हो हे कारवायेचो मुखेल हेत आसा.
अपघाता उपरांत कारवाय चड खर
परवा जाल्ल्या अपघाता उपरांत ही कारवीय चड खर केल्या. वीज खात्यान बेगोबेग खर पावलां उबारल्यांत. फाटल्या वर्सा सावन वीज खातें इंटरनॅट आनी केबल सेवा पुरवणदारांकडेन वीज खांब्यांचेर लटकपी केबल काडून उडोवपा खातीर फालोअप करता. परवा अपघात जाले उपरांत सांताक्रूझांतल्या सेवा पुरवणदारांक आपयल्लें. तातूंतलो कोणूच अजून आयिल्लो ना. ताका लागून आतां वीज खात्यान केबल कापपाचें काम सुरु केलां अशें कार्यकारी अभियंतो काशीनाथ शेट्ये हांणी सांगलें.
नेम आनी शुल्क वाद
वीज खात्याच्या खांब्यांचो वापर करपा खातीर आदीं परवानगी घेवप आनी शुल्क भरप गरजेचें आसा. पूण ह्या नेमाचें उल्लंघन जालां अशें खात्यान सांगलां. ‘रायट-ऑफ-वे शुल्क’ आनी 2024च्या दूरसंचार नेम पालन करपा विशीं आयएसपी आनी वीज खात्या मदीं फाटल्या कांय वर्सां सावन संघर्श सुरु आसा. भाडें फारीक करूंक नाशिल्लें, नागरिकांच्या सुरक्षेक धोको आनी नेमाचें उल्लंघन केल्ल्याचो आरोप करून खात्यान जायत्या खांब्यां वयले इंटरनॅट केबल कापल्यात. फुडाराक ही कारवाय चालूच उरतली अशें कार्यकारी अभियंतो शेट्ये हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
