भांगरभूंय | प्रतिनिधी
शिक्षण संचालनालयाचे सगळ्या शाळांक निर्देश
भांगरभूंय । प्रतिनिधी
पणजीः शाळेच्या वाठारां भितर बेवारशी सुण्यांचेर नियंत्रण दवरपा खातीर सद्या कसल्यो उपाय येवजण्यो केल्यात हे विशींची सद्याचे स्थितीचो अहवाल शिक्षण खात्यान मागयला. 17 नोव्हेंबर मेरेन हो अहवाल शिक्षण संस्थेच्या सगल्या मुखेलींक धाडपाचे निर्देश शिक्षण संचालक शैलेश झिंगडे हांणी दिल्यात.
सर्वोच्च न्यायालयान 7 नोव्हेंबराक स्वेच्छा दखल याचिकेत देशांतल्या सगळ्या शैक्षणीक संस्था जशे शाळा, महाविद्यालय आनी कोचिंग संस्थांच्या वाठारांत सुण्यांचो वावर आडावन विद्यार्थ्यां खातीर सुरक्षीत वातावरण तयार करपा खातीर उपाय येवजण हातांत घेवपाचो आदेश दिल्लो.
ह्या आदेशाक पाळो दित शाळांचे सुवातेत बेवारशी सुणीं भितर सरची न्हय हे खातीर योग्य ती जतनाय घेवची, शाळेच्या सरभोंवतणचो वाठार नितळ दवरचो आनी शाळे कुशीक सुण्यांची वस्ती आसा कांय ना ते पळोवपा खातीर तीन म्हयन्यांन एकदा नियाळ घेवचो, अशें निर्देश शिक्षण संचालनालयान परिपत्रक काडून सगळ्या मुळावी, सरकारी, अनुदानीत आनी बिगर अनुदानीत शाळांक दिल्ले.
आतां ह्या सुण्यांचेर नियंत्रण दवरपा खातीर शाळांकडे आशिल्ल्या सुविधा आनी उपक्रमांचो सद्याचे स्थितीचो अहवाल शिक्षण संचालनालयान मागयला. गुगल फॉर्म वरवीं शाळेचे वेवस्थापन सुविधा आनी उपक्रमा विशींची म्हायती दाखल करपाक सांगलां.
ह्या फॉर्मात शाळेचें नांव आनी तालुको घालचो. शाळांनी नियुक्त केल्ल्या नोडल अधिकाऱ्यांचें नांव आनी मोबायल नंबर दिवचो, सुणी शाळेचे सुवाते भितर येवचीं न्हय हे खातीर गरजेची सुविधा जशें दुरीग, वणट, गेट आनी वंय हे विशींची म्हायती दिवची. तशेंच जनावरांक हाताळप, सुणो चाबल्यार मुळावो उपचार घेवप आनी सुणीं चाबपाचो घडणुको नोंद करपा खातीर जागृताय सत्रां घेतला कांय ना हे विशींची म्हायती ह्या फॉर्मा भितर अपलोड करपाक सांगलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
