भांगरभूंय | प्रतिनिधी
जोयडा: येल्लापुरांतल्या अराबेल घांटांतल्या मारुती देवळा लागसार शुक्रारा रातीं भिरांकूळ अपघात जालो. गोंयांतल्यान केरळांत स्पिरीट घेवन वचपी लॉरीन झाडाक धपको दिलो. हाका लागून उजो लागलो आनी लॉरी काबार जाली. ड्रायव्हरान उडकी मारून जीव वाटायलो.
अपघात इतलो गंभीर आशिल्लो की लॉरींतल्या वस्तूंक लागून उजो बेगीन पातळ्ळो. सुदैवान लॉरीचो ड्रायव्हर श्रीनिवास रेड्डी (कर्नूल, आंध्रप्रदेश) हांणे गाडयेंतल्यान उडकी मारून आपलो जीव वाटायलो. ड्रायव्हराचे लॉरी वयले नियंत्रण सुटिल्ल्यान हो अपघात जालो.
ह्या अपघाताची म्हायती मेळटकूच येल्लापूर पुलीस आनी उजो पालोवपी दळाचे कर्मचारी रोखडेच सुवातेर पावले. उजो पालोवपी दळाच्या जावानंनी उजो नियंत्रीत हाडलो. ह्या अपघातांत कोणाक कांय जावंक ना, पूण लॉरी आनी भितरलो सगळो म्हाल पुरायपणान नश्ट जालो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
