भांगरभूंय | प्रतिनिधी
मुंबय, खबरां संस्था ः दक्षीण मुंबयत पुलिसांनी व्हड प्रमाणांत ड्रग्साचो सांठो जप्त केला. डोंगरी पुलिसांनी 15 कोटी रुपयांचें 3 किलो कोकेन जप्त केले. तेच बरोबर ह्या प्रकरणांत चेन्नयच्या बंदखणींतल्यान तीग जाणांक ताब्यांत घेतले.
ताब्यांत घेतिल्ले तिगूय आंतरराष्ट्रीय तस्करी रॅकेटाचे वांगडी आसात. इथिओपियांतल्यान हाडिल्ले कोकेन भरिल्लें ‘कॅप्सूल’ दक्षीण मुंबयच्या सबीना गेस्ट हाऊसांतल्या एका कुडींत दवरिल्लें.
पुलिसांनी दिल्ले म्हायती प्रमाण दक्षीण मुंबयच्या सबीना गेस्ट हाऊसांत रावपी मनशाक अजून धरूंक ना आनी तो फरारी आसा. पूण ताच्यो कांय वस्तू कुडींत मेळ्ळ्यात. हे म्हायतीचेर आदारीत डोंगरी पुलीस स्टेशनाचे वरिश्ठ पुलीस निरिक्षक गोंडुरम बंगार आनी मिनीनाथ वालेकर हांच्या मार्गदर्शना खाला सबीना गेस्ट हाऊसांतल्या कुडीची तपासणी केली. कुडीची तपासणी करतना तांकां एक कॅप्सूल आनी तातूंत कोकेन मेळ्ळें.
कॅप्सूलांतलें कोकेनाचे वजन 3 किलो आनी ताचे मोल 15 कोटी रुपयांचें आसा अशें पुलीस उपायुक्त डॉ. मुंधे हांणी सांगलें. ते उपरांत डोंगरी पुलिसांनी चवकशी सुरू केली तेन्ना ह्या प्रकरणांतलो दुबावीत तरुण कपूर हेर वांगड्यां वांगडा चेन्नयच्या बंदखणींत आशिल्ल्याचें कळ्ळें. तांकां एनसीबीन अटक केल्या. न्यायालयीन कोठयेंत आशिल्ल्या तिगांकय प्रक्रिया पुराय करून मुंबय हाडून अटक केली. तिगां मदीं तरुण कपूर (26), हिमांशु शाह (25) आनी साहिल अट्टरी (25) हांचो आस्पाव आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
