जिल्हो वेंचणुकेंत थिरायेक म्हत्व

भांगरभूंय | प्रतिनिधी

एकठांय रावल्यार जैत मेळटा हें बिहारांत भाजपा- जदयून दाखोवन दिलां. नकारात्मक प्रचाराचेर चड लक्ष दिवन काँग्रेस पक्षान आपले मतदारसंघ वगडायल्यात.

विदेशांत राबीतो करपी बिहारी भारतीयांक बिहार वेंचणुकेचे रिजल्ट खीणा भितर मेळटात. भारतांत आदले प्रधानमंत्री राजीव गांधी हांच्या सरकारान आरंभ केल्ल्या, उदरगतींत नव्या पावंड्यार आशिल्ल्या म्हायती तंत्रज्ञानाची ही क्रांती. देस- विदेसांतले ज्येश्ठ पत्रकार म्हाका सकाळ- सांज मेसेज धाडटात. तशे ते हुस्क्या मेकळे, लिखाणाची आवड आशिल्ल्यान पत्रकारितेंत आयिल्ले. तातूंत वेवसायांत भोंवतना विदेसांत पाविल्ले, परतून आपले मायभूंयेत आयिल्लेय आसात. तांची पत्रकारिता कागद, पेन, पेन्सिलीची, आयज मोबायल जाल्या. वाचन, लेखनांतल्यान अभ्यास करीत मुखार पाविल्ले अणभवी पत्रकार उदेंत्या सूर्याक नमस्कार करपी. बिहारांतल्या थळाव्या पत्रकारांक घेवन जेन्ना देश पावंड्यार दीस रात माध्यमांनी बुडिल्ले पत्रकार बिहार विधानसभा वेंचणुकेत भोंवतना दिसले. तांणी आपल्या दोळ्यांनी पळेल्ली उदरगत मतदारांक दाखयली. उक्तायल्ले अदमास लागीं- लागीं एकसारके. तेच खरे करपाची तांचीय जापसालदारकी आसता. बिहार वेंचणुकेन पत्रकारांक कितें जाप दिली? मतदान गुप्त आसता. कोणाक मत दितले, तुमकां कोण आवडटा अशें विचारिल्ल्यांक आमचे मत देसाक, उदरगतीक ही जाप मेळ्ळ्या. देसांतल्या केंद्र सरकारान बिहार राज्याची उदरगत जावची, जातली हे खातीर आधार दिलो. लखपती दीदी, करोडपती दीदी स्वयंपूर्णा, स्वयंसिद्धा जातना तांकांय आपल्या फुडारा कडेन पळोवपाची तांक आयल्या. बिहारातलें जैत गोंयचे जिल्हो वेंचणुकेक उपेगी जातलें. फोंडें विधानसभा पोट वेंचणुकेचो मार्ग दिसतलो. केंद्र, राज्य सरकाराची थिराय, उदरगतीचीं पावलां जिल्हो वेंचणुके खातीर म्हत्वाचीं थारतलीं. 

हो लेख बरयतना बिहार विधानसभा वेंचणुकेंत पयले फावट सगल्यांत व्हडलो राजकी पक्ष म्हणून भारतीय जनता पार्टी मुखार सरता अशी म्हायती माध्यमां कडल्यान मेळ्ळी. देसांत आनी राज्यांत एक राजकी पक्ष सगल्यांत व्हड आसल्यार उदरगतीची पावलां उजव्यान पडटात. पिरायेची आडमेळीं आसतना एकठांय रावन प्रधानमंत्री नरेंद्र मोदी, बिहाराचे मुखेलमंत्री नितीश कुमार वेंचणूक प्रचाराक पावले. वेंचणूक वेवस्थापन, कार्यकर्त्यांचे बांदावळीचो वावर आदलें सरकार सत्तेर आयलें तेन्नाच भाजपान केल्लो. भाजपाच्या जैताचो नियाळ करपी वरीश्ठ राजकारण्यांनी तें सांगलां. सुशासन, थिराय, थळावें नेतृत्व, नवे पिळगेक राजकारणात देंवोवपाचे भाजपाचे यत्न फळादीक ठरतात. गोंयचे जिल्हो वेंचणुकेंतच न्हय विधानसभा वेंचणुकेंतय उंचेलें शिक्षण घेतिल्ले अस्तुरेक उर्बा मेळटली अशी आस्त दवरुया. जनता दल युनायटेड ह्या आदल्या राजकी पक्षाच्या युती/ आघाडेंतल्यान भाजपा फुडें गेल्या. एकठांय रावल्यार जैत मेळटा हें बिहारांत भाजपा- जदयून दाखोवन दिलां. नकारात्मक प्रचाराचेर चड लक्ष दिवन काँग्रेस पक्षान आपले मतदारसंघ वगडायल्यात. काँग्रेस पक्षान नवी उदरगत कशी जाली हें सांगपाची गरज आशिल्ली. सगल्या राजकी पक्षाच्या जाहीरनाम्यांत अस्तुरेच्या उदरगतीच्यो येवजणी आसात, अस्तुरेक राजकारणांत हाडपाचे यत्न जाले. बिहारांत अस्तुरी मतदार वाडत आसात, तांचे पासत मतदानकेंद्रां लागीं हाडपाचो वावर वेंचणूक आयोगान केलो, जागृताय जाली. अस्तुरेक 33 टक्के आरक्षण केंद्रांतल्या एनडीए सरकारान दिलें, तें आतां चालीक लागतलें ही गवाय प्रधानमंत्र्यानी दिली. मैथिली ठाकूरावरी 25 वर्सांची युवा गायक विधानसभा वेंचणुकेंत जिखप म्हत्वाचें आसा. गोंयचे जिल्हो पंचायत वेंचणुकेंत युवा अस्तुरी आसची. आवय- बापायच्या राजकी दायजांतल्यान, कुशळतायेन गोंयांत फुडारांतलें नेतृत्व घडपाची वाट जिल्हो वेंचणूक दाखयता. केंद्रीयमंत्री श्रीपाद नायक हांचे पूत सिद्धेश ही जिल्हो वेंचणुकेंतल्यान मुखार येवपी नेतृत्वाची देख. आमदार जेनिफर मोन्सेरात, आमदार आलेक्स रेजिनाल्ड लाॅरेन्स हांच्योय देखी आसात. 

वेंचणूक लागीं येतना साबार मतदारयाद्यो सारक्यो हाचेआदींय जाल्यात, अंदू तातूंत मुखेल जातले हें अर्ज पळयल्यार दिसता. जिल्हो, पंचायत, नगरपालिका वाठारांतले मतदार विधानसभा वेंचणुकेत मतदान करतात. मतदारयाद्यो करपाचो वावर करपी सरकारी कर्मचारी. एका दोन दिसांचें तें काम न्हय. ते खातीर वगत, वेळापत्रक आसा. वेंचणूक आयोग बिगर सरकारी यंत्रणांचोय उपेग करता व्हडा प्रमाणात पयसो दिवन तें थांबोवपाची गरज आसा. जिल्हो वेंचणूक फुडें धुकल्ल्यार प्रशासकांच्या हातांत जिल्हो वेवस्थापन दिवप म्हणल्यार जिल्ह्यांच्या मतदारसंघांचें वेवस्थापन सवकासायेन चलप. विधानसभा वेंचणूक लागीं येता तेन्ना तें सरकाराक कशें परवडटलें?

जिल्हो पंचायतीचीं वेंचणूक जातना राज्य सरकारान केंद्र सरकाराच्या फाटल्यान लागून पंचायत कायद्यांत बदल हाडपाची गरज आसा. जिल्ह्यां परस चड अधिकार पंचायतींक आसात, तातूंतले खंयचे अधिकार जिल्ह्यांक दिवचे तें ठरोवपाची मागणी करपाक जाय. मुख्यमंत्री डाॅ. प्रमोद सावंत फाटल्या अणभवांतल्यान बरेच शाणे जाल्यात. घेतिल्ल्या निर्णयांत बदल करप ना हें तांचें शाणपण राज्याक बळगें दिवपी. म्हजें घर येवजणेंतल्यान कार्यकर्त्यांक, गोंयकारांक जागें करपाच्यो कार्यावळी करपाचो वगत म्हत्वाचो. गोंयच्या साबार वाठारांतल्या मतदारां मेरेन वचपाक, प्रस्नाच्यो जापो दिवपाक ते शिकल्यात. तांचो अणभव पक्षाक लाव मेळोवन दिता, पक्ष खंय उणो पडटा तें कळटा. ह्याच वगतार आपलें, सरकाराचें, पक्षाचें उणेपण कळप सुदारपाकय उपेगाचें. थळावे, थळांतरांतल्यान आयिल्ले कोण हें जिल्हो वेंचणूक सांगतली. कितले आसतले थळांतरांतल्यान आयिल्ले? पन्नासांत 5 – 20? गोंय अजूनय गोंयकारांचें आसा, तें सुपुल्लें तरी तें गोंयकारांचेच हें जिल्हो वेंचणूक दाखोवन दितली.

सुहासिनी प्रभुगांवकार