सुण्यां खातीर आलाशिरो स्थान आनी वंय बांदची

भांगरभूंय | प्रतिनिधी

प्राणी म्हासंघाची पत्रकार परिशदेंत मागणी

पणजी: सर्वोच्च न्यायालयान 7 नोव्हेंबर दिसा बेवारशी सुण्यां विशीं दिल्ल्या आदेशाची अंमलबजावणी करचे पयलीं गोंयांत सुण्यां खातीर आलाशिरो स्थान (शेल्टर) तशेंच चार प्रकारच्या संस्थांक वंय बांदची अशी मागणी गोंय प्राणी म्हासंघान केली. शुक्रारा पणजेंत जाल्ले पत्रकार परिशदेंत ही मागणी केली. ह्या वेळार प्रकाश कामत, डॉ. स्टेसी सिक्वेरा, के. डी. राव, श्वेता सरदेसाय आनी विजेंद्र गायरोला हाजीर आशिल्ले. न्यायालयाच्या आदेशाचो चुकीचो अर्थ लावचो न्हय अशें आवाहनूय तांणी ह्या वेळार केलें.

प्रकाश कामत हांणी सांगलें, सर्वोच्च न्यायालयान शाळा, म्हाविद्यालय, हॉस्पिटल, रेल्वे आनी बस स्टॅण्ड आनी खेळां संकूल आदीं संस्थांनी सामुदायीक सुण्यांक नसबंदी वा लसीकरणा खातीर उबारून व्हरचे आनी उपरांत तांकां आलाशिरो स्थानांनी धाडचे अशें स्पश्ट केलां. हो आदेश हेर खंयचेय संस्थेक वा रस्त्यांक लागू ना. सोसायटी, बाजारपेठ आनी हेर भौशीक सुवातांनी भारतीय प्राणी कल्याण मंडळाच्या सद्याच्या प्राणी जल्म नियंत्रण नेम 2023 प्रमाण बेवारशी सुण्यांचे वेवस्थापन सुरू उरतलें.

गोंयांत 1,100 परस चड शाळा, म्हाविद्यालयां आसात. हाचे बगर हॉस्पिटलां, खेळां संकूल, रेल्वे आनी बस स्टॅण्ड अश्यो 100 परस चड इमारती आसात. आदेशा प्रमाण त्या सगल्यांक आठ सप्तकां भितर वंय घालची पडटली. ह्या संस्थांक वंय बांदिनासतना थंय सावन बेवारशी सुण्यांक काडून उडोवपाचो यत्न करीत जाल्यार ती सुवात नवीं सुणीं घेतलीं. हांगासरल्या सुण्यांक नेमणूक केल्ल्या आलाशिरो स्थानांनी हालोवंक मेळटलें. पूण सद्या गोंयांत कसलेंच नियुक्त अशें आलाशिरो स्थान ना अशें प्रकाश कामत हांणी सांगलें.

तांणी मुखार म्हणलें, थळाव्या लोकस्वराज्य संस्थांक हें नियुक्त आलाशिरो स्थान बांदचें पडटलें. तें तयार जाय मेरेन खंयचोच सुणो उबारून व्हरूंक मेळचो ना. कायद्या प्रमाण अलाशिरो स्थान म्हणल्यार फक्त एक आवार न्हय जाल्यार तातूंत सगले तरेच्या हवामानांत वापरूंक येता अशें पाखें, सुण्यांचें वेवस्थापन, रांदप, आहार, उदक आनी नितळसाणे खातीर कर्मचारी आसप गरजेचें आसा. तातूंत दुयेंत सुण्यां खातीर एक वेगळो उपचार वाठार लेगीत आसूंक जाय. सुण्यांक उबारून व्हरपाचो कसलोय यत्न जरी करीत जाल्यार तो न्यायालयाचो आदेश आनी कायद्याचो अवमान आसतलो.

सर्वोच्च न्यायालयाच्या आदेशा प्रमाण सुण्यांक वयल्या चार संस्थांनी खावपाक दिवपाक बंदी घाल्ली ना. न्यायालयाचो आदेश हॉस्पिटल, शाळा हांकां सुरक्षीत दवरप आसलो तरी ही विशिश्ट येवजण वेव्हारीक ना आनी हाका लागून भौशीक पयश्यांचो अपव्यय जावपाची शक्यताय आशिल्ल्याचें गायरोला हांणी सांगलें.