भांगरभूंय | प्रतिनिधी
मंत्री सुभाष शिरोडकार : राष्ट्रीय सहकार सप्तकाचें उक्तावण
भांगरभूंय । प्रतिनिधी
पणजी : गोंयांतल्या तरणाट्यांक सहकार, शेतकी मळार हाडपा खातीर काम करप गरजेचें आसा. हे खातीर आमी सगल्याननी यत्न करपाक जाय, अशें सहकार मंत्री सुभाष शिरोडकार हांणी सांगलें. शुक्रारा पणजे 72 व्या राष्ट्रीय सहकार सप्तकाच्या उक्तावण सुवाळ्यांत ते उलयताले.
ह्या वेळार खात्याचे सचीव यंतीद्र मरळकर, सहकार निबंधक आशुतोष आपटे, नाबार्डचे संदीप धारकर, सतीश मराठे, शरद गांगल उपस्थीत आशिल्ले.
मंत्री शिरोडकार हांणी सांगलें, गोंयांत सहकाराचीं पाळां मुळां 400 ते 500 वर्सां आदींच रुजिल्लीं. त्या काळा वयल्या शेतकारांनी एकठांय येवन खाजन शेती सुरू केली. समिती स्थापन करून सामुहीक शेतीचे प्रयोग केल्ले. आयज गोंयांत व्हड सहकार चळवळ उबी रावपाक जाय, अशी आमची अपेक्षा आसा. आमकां एका वर्सांत 200 सहकारी संस्था निर्माण करपाच्यो आसा. म्हाविद्यालयीन विद्यार्थ्यां मदीं सहकारा विशीं जागरुकता निर्माण जावचे खातीर यत्न करतात. गोंयांत सुमार 4 लाख विद्यार्थी आसात. तांकां गरजेचें आशिल्लें शालेय साहित्य सरकाराच्या माध्यमांतल्यान विकपाक मेळूं येता. आमचे शिक्षण संस्थेंत आमी होच प्रयोग 1971 त येसस्वी करून दाखयल्लो. गोंयांत समाज शिक्षीत आसा. गोंयांत शिक्षण, भलायकी, सहकारा सयत सगल्या मळांचेर आदर्श तयार करप शक्य आसा. ते खातीर खात्यांतले अधिकारी तशेंच सहकार मळा वयल्या ज्येश्ठांनी यत्न करप गरजेचें आसा. आमी समाजांत रावतात. समाजाक देणें लागतात, हें समजून घेवप गरजेचें आसा, अशें शिरोडकार हांणी सांगलें.
माशेल महिला सहकारी बँक करतले पुनरुज्जीवीत
माशेल महिला सहकारी बँके संबंदांत सध्या चवकशी चल्ल्या. ही बँक पुनरुज्जीवीत करचे खातीर आमचे यत्न चल्ल्यात. एप्रील 2026 मेरेन गोंयांतल्या सगल्या संस्थांचे डिजिटायझेशन करचे खातीर आमचे यत्न चालू आसात, अशें मंत्री सुभाष शिरोडकार हांणी सांगलें.
एक हजार हऐक्टर जमीन लागवडी खाला
गोंयांत सहकार आनी शेतीचो पोरणो संबंद आसा. गोंयांत एक हजार हॅक्टर जमीन लागवडी खाला हाडचे खातीर आमी यत्न करतात. हे खातीर आमी उदकास्रोत खात्या वतीन गरजेचें उदक दिवचे खातीर तयार आसात. नाबार्ड सारक्या बँकांनी हातूंत आमची मजत करची, अशें मंत्री शिरोडाकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
