भांगरभूंय | प्रतिनिधी
अधिकाऱ्यांक दिले 613 उमेदवारांचे 17.68 कोटी
भांगरभूंय । प्रतिनिधी
पणजी : मेगा भरती वेळार (2019) एक आयएएस अधिकारी आनी बांदकाम खात्याच्या एका वरिश्ठ अभियंत्याक 17 कोटी 68 लाख रुपया दिले. 613 उमेदवारां कडल्यान ते एकठांय केल्ले. एका वरिश्ठ मंत्र्याच्या सांगण्या वयल्यान हें काम केलां तशेंच हे विशींचे पुरावे लेगीत पुलिसां कडेन आसात, असो गंभीर आरोप पुजा नायकान केला.
2019 त मेगा भरती जाहीर जाल्ली तेन्ना दोगां अधिकाऱ्यांच्या संपर्कांत रावन तुवें ह्या नोकऱ्यां खातीर इतले- इतले पयशे घेवपाचे, अशें एका वरिश्ठ मंत्र्यान म्हाका स्पश्ट सांगिल्लें. हांवें सुमार 613 अर्ज 17.68 कोटी रुपयां सयत त्या दोगांय कडेन पावयल्यात. हे पयशे म्हाका परत मेळोवन दिवचे ही म्हजी मागणी आसा. कारण कोणाक नोकऱ्यो मेळूंक नात. हांवें पुलिसांक स्टेटमेंट दितना मंत्र्याचें न्हय, मात ह्या दोगांय अधिकार्यांचीं नांवां सांगिल्लीं. पर्वरे फ्लॅटांत हांवें हे पयशे त्या अधिकार्यांच्या हातांत दिल्यात. मात पुलीस आतां म्हणटात, थंयसर फ्लॅट ना, तर आयएचएम ही शिक्षणीक संस्था आसा. मुख्यमंत्र्यांचो ह्या सगल्या प्रकरणांत कसलोच हात ना, अशेंय स्पश्टीकरण पुजान पत्रकारां कडेन उलयतना दिलें. हे पयशे दिल्ल्याचे सगळे पुरावे म्हज्या मोबायलांत आशिल्ले. एका मोबायलांत दोन व्हिडियो पसून आशिल्ले. तो मोबायल पयलींच दिवचले पुलीस स्टेशनांत म्हजे कडल्यान जप्त केल्लो. मात दिवचल पुलिसांक मोबायला विशीं विचारले उपरांत तांणी सांगलें, तो मोबायला म्हाड्डोळ पुलिसांक धाडला. मात अजून मेरेन तो मोबायल म्हाका परत मेळूंक ना, असो दावो पुजान केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
