भांगरभूंय | प्रतिनिधी
पणजी : पुजा नायक हिच्या ‘कॅश फॉर जॉब’ प्रकरणांत वीज मंत्री सुदिन ढवळीकार तशेंच एक आयएएस अधिकारी आनी भौशीक बांदकाम खात्याचो प्रधान मुख्य अभियंतो ह्या तिगांचीं नांवां घेवन काँग्रेसीचे प्रदेशाध्यक्ष अमीत पाटकार हांणी जाहीर करून तांचेर खर कारवाय करपाची मागणी केल्या. हाचेर शुक्रारा काँग्रेसीचोच आमदार कार्लोस फेरेरा हांणी वीज मंत्री ढवळीकार हांकां गरजे भायर बदनाम करपाचो यत्न चल्ला असो आरोप केलो.
कार्लोस हांणी म्हणलां, 2019 त मगोच्या दोन आमदारांनी भाजपांत प्रवेश केले उपरांत भाजप सरकारान सुदिन ढवळीकार हांकां मंत्रीमंडळांतल्यान कडिल्लो. म्हणजे 2019 ते 2022 मेरेन ढवळीकार मंत्रीमंडळांत नाशिल्ले. पुजान आरोप केला ते प्रमाण 2019 ते 2022 ह्या काळांत तिणें मंत्र्याक नोकर भरती खातीर पयशे दिल्यात. जर ढवळीकार मंत्रीच नाशिल्ले जाल्यार पुजा तांचें नांव कशें कितें घेतां? पुजा वरवीं ढवळीकार हांची बदनामी करपाचो यत्न कोण तरी करता. हाचे फाटलो सुत्रधार तांचो राजकी दुस्मान काय भाजपाच करता काय कितें तें सोदपाक जाय. पुजाचे त्या दिसांतलें कॉल रेकॉर्ड तपासपाक जाय. त्या दिसांनी ती कोणा कोणा कडेन उलयल्या तें पळोवपाक जाय. हाचे आदीं पर्वरेच्या भाजपाचे एके महिला कार्यकर्त्याचें नांव नोकर भरती घोटाळो प्रकरणांत फुडें आयिल्लें. ताचें कितें जालें? तें प्रकरण लिपोवचे खातीर ही भाजपान खटपट चलयल्या काय कितें, असोय प्रस्न कार्लोस हांणी उपस्थीत केला.
14 दिसांनी प्रतिक्रिया दितलों : ढवळीकार
सध्या कांयच उलोवचों ना. फुडल्या 14 दिसांनी प्रतिक्रिया दितलों. आपूण पुजा नायक हिका वळखना, तिका केन्ना मेळूंक ना. ‘कॅश फॉर जॉब’ प्रकरणाची पणजेचो गुन्यांव फांटो तपास करता. मुख्यमंत्री डॉ. प्रमोद सावंत हांणी पुलिसांक ताकतिकेन तपास करपाचो आदेश दिला. पुलिसांनी 14 दिसां भितर तपास करता, अशें म्हणलां. 14 दिसांनी पुलीस अहवालांत खरें फट कितें ते कळटलें, अशें ‘कॅश फॉर जॉब’ प्रकरणांत नांव मुखार आयले उपरांत शुक्रारा मंत्री सुदिन ढवळीकार हांणी आपली भुमिका स्पश्ट केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
