भांगरभूंय | प्रतिनिधी
पणजी : गोंय पर्यटन विभागा वतीन आंतरराष्ट्रीय पर्यटन स्थळ आशिल्ल्या कोलवा दर्यादेगेर स्वदेश दर्शन प्रकल्प उबारपाच्यो हालचाली सुरू आसात. मात, हो प्रकल्प नेमको कितें, हाची सविस्तर म्हायती दिवपाची मागणी थळावे नुस्तेंमारी आनी हेरांनी दिली.
प्रकल्प नेमको कितें आनी ताचो नुस्तेंमारी मळार, उपजिविकेचेर कितें परिणाम जातलो? सोबितीकरणाची सविस्तर म्हायती दिवची, अशी मागणी थळाव्यांनी केल्या.
ह्या प्रकल्पा विशीं थळाव्यांनी जायते प्रस्न हाजीर केले. पर्यटन विभागाचो स्वदेश दर्शन २.० हो प्रतिश्ठीत कोलवा दर्यादेगेवेलो प्रकल्प कितें? ही येवजण फकत लायटींचो चकमक आनी हेर सुविधां सयत प्रतिश्ठीत दर्यादेगेचें सोबितीकरण करपा विशीं आसा काय फकत सध्याच्या शॉपिंग सेंटराची उदरगत करपा खातीर आसा?
थळावे नुस्तेंकार सध्या हागां नुस्तें सुकोवप, मीठ, नुस्तें सांठोवप अश्या खुबश्या कामां खातीर पर्यटन विभागाची ही सुवात वापरतात, ताचें कितें? स्वदेश दर्शन २.० खातीर नुस्तेंमार्यांक थंयच्या काडटले काय? अशे प्रस्न नुस्तेंमार आनी थळाव्यांनी हाजीर केल्यात.
गोवा पर्यटन विकास महामंडळान बाणावलेचे आमदार व्हेंझी व्हिएगस, सरपंच ट्रेझा,आदले सरपंच सुझी फर्नांडिस आनी हेरां सयत विकास आराखडो निमाणो करचे पयलीं दर्यादेगेची पळोवणी केली. उपरांत कोलवाच्या थळाव्यांनी वयर दिल्ले प्रस्न विचारले.
बाणावलेचे आमदार व्हिएगस हांणी दिल्ले म्हायती प्रमाण, जीटीडीसीन स्वदेश दर्शन २.० चो मसुदो एक वा दोन दिसांनी कोलवा ग्रामपंचायतीक धाडप अपेक्षीत आसा.
कोलवा पंचायतींत आराखडो प्रदर्शीत जाले उपरांत पंचायत आराखड्यार चर्चा करपा खातीर विशेश ग्रामसभा आपयतले. उपरांतूच फुडलो निर्णय जातलो अणें आमदार व्ह्एिगस हांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
