भांगरभूंय | प्रतिनिधी
मडगांव: फाटले जिल्लो पंचायत वेंचणुकेंत भाजपान उत्तर गोंयांत २२ आनी दक्षीण गोंयांत १४ सुवातो जिखल्यो. येवपी जिल्लो पंचायत वेंचणुकेंत भाजपाचे उमेदवार पुराय भोवमतार वेंचून येतले, असो विस्वास मुख्यमंत्री डॉ. प्रमोद सावंत हांणी उक्तायलो.
दक्षीण गोंय भाजप कार्यालयाच्या लागसार मुख्यमंत्री प्रमोद सावंत, भाजप प्रदेशाध्यक्ष दामू नायक, मंत्री सुभाष फळदेसाय, मंत्री सुभाष शिरोडकार, मंत्री रमेश तवडकार, आमदार उल्हास तुयेंकार हांचे सयत भाजप कार्यकर्त्यांनी बिहार वेंचणुकेंतल्या एनडीएचें जैत मनयलें.
मुख्यमंत्र्यांनी ह्या वेळार म्हणलें, बिहारच्या मतदारांनी जंगलराज आनी गुंडाराज न्हयकारून उदरगतीक मतदान केलां. प्रधानमंत्री नरेंद्र मोदी आनी मुख्यमंत्री नितीश कुमार हांच्या नेतृत्वाखाला बिहारच्यो वेंचणुको जाल्यो. हातूंत एनडीएच्या उमेदवारांनी २०० परस चड सुवातांचेर जैत मेळयलां. विरोधकांक क्लीन स्वीप दिवन एनडीएन भोवमत मेळयलें.
कांय पक्ष फकत जाती आनी धर्माच्या नांवार मतां मेळोवपाचो यत्न करतात. मात भाजपचें डबल इंजिन सरकार फकत उदरगतीच्या मुद्यारूच वेंचणुको जिखतात. ह्यान फुडें वेंचणुको जाती आनी धर्माच्या आदारार लढचे नात. देशांत सुमार २० परस चड राज्यांनी एनडीएचें सरकार आसा. विकसीत भारत २०२७ खातीर काम चालू आसा. बिहारचे जनते प्रमाणूच येवपी जिल्लो पंचायत आनी पालिका वेंचणुकेंत गोंयची जनता भाजपा वांगडा रावतली असो विस्वास मुख्यमंत्र्यांनी उक्तायलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
