भांगरभूंय | प्रतिनिधी
कायम स्वरूपी मिनरल फंड वापरा खातीर सर्वोच्च न्यायालयान परवानगी दिवची म्हूण केली मागणी
मडगांव: खण प्रभावीत भागांतले जनतेचे उदरगती खातीर आनी तांकां गरजेच्या सुविधांची पुरवण करपाक राज्य सरकार यत्न करता. हाका लागून दवरिल्लो कायम स्वरूपी मिनरल फंड वापरा खातीर सर्वोच्च न्यायालयान परवानगी दिवची, अशी मागणी मुख्यमंत्री डॉ. प्रमोद सावंत हांणी केली. दक्षीण गोंय जिल्लोधिकारी कार्यालयांत दक्षीण गोंय जिल्लो मिनरल फावंडेशनाच्या निधींतल्यान वित घेतिल्लीं ८ वाहनां भौशीक सेवे खातीर भेटयलीं. ह्या वेळार मुख्यमंत्री उलयताले.
१.२० कोटींची आठ वाहनां दिलीं
दक्षीण गोंय जिल्लो मिनरल फावंडेशनाच्या निधींतल्यान सुमार १.२० कोटी रुपया खर्च करून वट्ट आठ नवीं वाहनां विकतीं घेतलीं आनी तीं भौशीक सेवे खातीर दिलीं. ह्या वाहनांनी चार महिंद्रा स्कॉर्पिओ, दोन ऍम्बुलन्सी आनी दोन मिनी पिकअप वाहनांचो आसपाव आसा. हीं वाहनां आपत्कालीन वेवस्थापन कक्ष आनी पुलीस खात्याक दिलीं. दोन पिकअप वाहनां विशेश म्हळ्यार सांगें, धारबांदोडें, केपें, काणकोण आनी फोंडें ह्या प्रभावीत भागां टातीर दिलीं. तशेंच, जिल्लो मिनरल फंडांतल्यान तीन दिव्यांग मनशांक तीनचाकी वाहनांय दिलीं.
मुखार उलयतना मुख्यमंत्री डॉ. सावंत हांणी सांगलें, दक्षीण गोंय जिल्लोधिकार्यांचे अध्यक्षते खाला ह्या निधीचो वापर बर्या कामा खातीर करतात. खाणप्रभावीत भागां खातीर पुलीस, नितळसाण आनी भलायकी अश्या विवीध कामां खातीर हीं वाहनां उपेगी थारतलीं. फुडें वर्सभर मिनरल फंडाचो वापर आनी बर्या कामां खातीर करचो, अशी निर्देशूय तांणी दिले.
ह्या वेळार समाजकल्याण मंत्री सुभाष फळदेसाय, जिल्हाधिकारी एग्ना क्लिटस, पुलीस अधीक्षक टिकमसिंग वर्मा हांचे सयत जिल्लोधिकारी कार्यालयांत्तले कर्मचारी हजर आशिल्ले.
बिहारच्या निकालाचेर मुख्यमंत्र्यांची प्रतिक्रिया
मुख्यमंत्री डॉ. प्रमोद सावंत हांणी बिहारच्या वेञचणुकेच्या निकालाचेरूय प्रतिक्रिया उक्तायली. तांणी म्हणलें, बिहार वेंचणुकेंत प्रधानमंत्री नरेंद्र मोदी आनी मुख्यमंत्री नितीश कुमार हांच्या नेतृत्वा खाला एनडीए मुखार आसा. धा वर्सांनी डबल इंजिन सरकारान बिहारांतलें जंगलराज सोपोवन उदरगत केल्या. जात, धर्म आनी हेर मुद्दे कुशीक दवरून उदरगतीक मतदान केल्ले खातीर तांणी बिहारचे जनतेक परबीं भेटयलीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
