भांगरभूंय | प्रतिनिधी
मुख्यमंत्री: गोंयांक फायदो जावचे खातीर २०० एमएलडी तांकीचे नवे प्रकल्प उबारतले
मडगाव: गोंयांत उदकांतल्या पायपांची गळटी आनी उदकाची चोरी ह्या दोन मुखेल कारणांक लागून सुमार ४० टक्के पिवपाचें उदक पेड्ड्यार जाता. उदकाची ही गळटी आनी चोरयेचें प्रमाण ५० टक्क्यांनी उणें करपाचो राज्य सरकाराचो यत्न आसा, अशी म्हायती पेयजल मंत्री सुभाष फळदेसाय हांणी दिली.
पिवपाच्या उदका विशीं उलयतना मंत्री फळदेसाय हांणी, राज्यांतलीं उदकाचीं पायपां ४० ते ५० वर्सां पोरणीं जाल्यांत. हाका लागून व्हडा प्रमाणांत उदकाची गळटी जाता. हीं पायपां बदलपाक व्हड निधीची गरज आसा. राज्या खातीर उपलब्ध आशिल्लें ७०० एमएलडी उदकाचो पुरायेन वापर जावचे खातीर वर्सभर यत्न करतले. उदकाची चोरी आनी गळतीचें प्रमाण उणें करून पिड्ड्यार जावपी उदकां उण्यांत उणें ५० टक्के कपात करपाचें लक्ष्य आसा. गोंयांक फुडाराक फायदो जावचे खातीर २०० एमएलडी तांकीचे नवे प्रकल्प उबारतले.
राज्यांत डिजिटल स्मार्ट मिटर बसोवपाचोय विचार आसा, मात ताचे पयलीं उदकाची विक्री आनी महसूल कितलो परत मेळटलो, तशेंच गिरायकांचेर कसलोच आनीक भार पडचो ना हाची जतनाय सरकार घेतलें. क्रिया केल्लें उदक सरकाराक २५ रुपयांनी पडटा, जाल्यार तेंच उदक गिरायकां फकत ४ रुपयांनी दितात. हाका लागून सरकाराक पयलींच बरेंच व्हड लुकसाण सोंडचें पडटा, अशी म्हायती तांणी दिली.
खाण खळग्यांतल्या उदकाचो वापर
राज्यांतल्या खाण खळग्यांतल्या उदकाचो वापर पिवपाक करपाक मेळटलो काय, हे दिकेनूय सरकार यत्न करता. खळग्यांतल्या उदकाचे नमुने तपासणी खातीर घेतल्यात. मुळावे तपासणेंत ह्या उदकांत माल पडपी द्रव्यांचें प्रमाण खूब उणें आसा, हाका क्लोरिनेशनचीय गरज आसची ना, अशे परिणाम दिसून आयल्यात. विशेश म्हळ्यार ह्या खाण खळग्यांतल्या उदकाचें निरीक्षण केलें तेन्ना अहवाला वेळार तें साळावली धरणांतल्या उदका परस बरे आशिल्ल्याचें दिसून आयलां. फुडल्या तीन ते चार म्हयन्यात हे संबंदी बरे निश्कर्श मेळटले. हाचे वरवीं येवपी काळांत राज्यांत पिवपाच्या उदकाची कसलीच समस्या येवची ना, असो विस्वास मंत्री फळदेसाय हांणी उक्तायलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
