भांगरभूंय | प्रतिनिधी
पणजी : राज्यांतले तरणाटे पिळगेक सहकार, कृषी मळार गुंतोवपा खातीर काम करप गरजेचें. हे खातीर सगल्यांनी यत्न करप गरजेचें, अशें मत सहकार मंत्री सुभाष शिरोडकार हांणी उक्तायलें. शुक्रारा पणजे ७२ व्या राष्ट्रीय सहकार सप्ताकाच्या उक्तावण सुवाळ्यांत ते उलयताले. ह्या वेळार खात्याचे सचिव यंतीद्र मरळकार, सहकार निबंधक आशुतोष आपटे, नाबार्डचे संदीप धारकार, सतीश मराठे, शरद गांगल आनी हेर हाजीर आशिल्ले.
शिरोडकार हांणी, गोंयांत सहकाराचीं पाळां मुळा ४०० ते ५०० वर्सां आदींत ुजिल्लीं. तेन्नाच्या शेतकारांनी एकठांय येवन खाजन शेती सुरू केली. समिती स्थापन करून सामुहीक शेतीचे प्रयोग केल्ले. आयज राज्यांत व्हड सहकार चळवळ उबी रावपाक जाय, अशी आमची अपेक्षा आसा. आमकां एका वर्सान २०० सहकारी संस्था निर्माण करपाच्यो आसात. महाविद्यालयीन विद्यार्थ्यां मदीं सहकारा विशीं जागरूकताय निर्माण जावपा खातीर यत्न करतात.
राज्यांत सुमार चार लाख विद्यार्थी आसात. तांकां गरजेचें आशिल्ले शाळेचें सामान सहकाराच्या माध्यमांतल्यान विकपाक मेळपाक शकता. आमचे शिक्षण संस्थेंत आमी होच प्रयोग १९७१ त येसस्वी करून दाखयिल्लो. गोंयचो समाज शिक्षीत आसा. हांगा शिक्षण, भलायकी, सहकारा सगल्या मळांचेर आदर्श तयार करप शक्य आसा. हे खातीर खात्यांतले अधिकारी तशेंच सहकार मळावेल्या दिग्गजांनी यत्न करप गरजेचें. आमी समाजांत राविल्लयन आमकां सामाजाचें देणें लागता हें समजून घवप गरजेचें अशें तांणी सांगलें.
माशेल बायलां पुनरुज्जीवीत करतले
शिरोडकार हांणी, माशेल महिला सहकारी बँके विशीं सध्या चौकशी सुरू आसा. ही बँक पुनरुज्जीवीत करपा खातीर आमी यत्न करतात. एप्रील २०२६ मेरेन राज्यांतल्या सगल्या संस्थांचे डिजिटायझेशन करपाक आमी यत्न करतात.
एक हजार हॅक्टर जमीन लागवडी खाला
राज्यांत सहकार आनी शेतीचो बरोच आदलो संबंद आसा. राज्यांतली एक हजार हॅक्टर जमीन लागवडी खाला हाडपा खातीर आमी यत्न करतात. हे खातीर आमी उदकास्रोत खात्या वतीन गरजेचें उदक दिवपाक तयार आसात. नाबार्ड सारकिल्ल्या बँकांनी हातूंंत आमची मजत करची, अशें तांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
