कोलवाळे बंदखण कोकेन तस्करी : तिनूय आरोप्यां आड गुन्यांव निश्‍चीत करपाचो आदेश

भांगरभूंय | प्रतिनिधी

म्हापशें: कोलवाळचे बंदखणींत जून २०२२ वर्सा उक्तडार आयिल्ल्या ड्रग्ज तस्करी प्रकरणांत व्हड कायदेशीर गजाल घडली. मेरशेच्या अतिरीक्त सत्र न्यायालयान ह्या प्रकरणांत सुरज शिवाजी गावडे (जेलगार्ड), विकट सुरेंद्र भगत (बंदखणींतलो कैदी) आनी योगेश नागेश पागी (ड्रग्ज पॅडलर) ह्या तिनूय दुबावितां आड आरोप निश्‍चीत करपाचो आदेश दिला. न्यायाधीश क्षमा जोशी हांणी घुवळे वखदां प्रतिबंधक कायदो कलम २१(ब) आनी २९ अन्वये हो म्हत्वाचो आदेश दिला.

नेमकें कितें घडिल्लें?
हा ड्रग्ज तस्करीचा प्रकार २२ जून २०२२ रोजी उघडकीस आला होता. सकाळीं ११ वरांच्या सुमाराक जेलगार्ड सुरज गावडे (रा. कुंकळ्ळी) बंदखणींत ड्युटीचेर वचपा खातीर वतना, बंदखणीच्या तपासणी नाक्याचेर राखीव दळाच्या पुलिसांक तांचेर दुबाव आयलो. तपासणी केली तेन्ना, दुबावीत जेलगार्ड गावडे हांचे कडेन ४ ग्रॅम कोकेन (किंमत सुमार ५२ हजार रुपया) सांपडलो.
राखीव दळाचे तेन्नाचे पुलीस निरीक्षक सुशांत जोशी हांणी बेगोबेग ही म्हायती कारागृह प्रशासन आनी कोलवाळ पुलिसांक दिली. कोलवाळ पुलिसांनी घडणुके सुवातेर पंचनामो करून जेलगार्डाक एनडीपीएस कायद्या खाला अटक केली आनी कोकेन जप्त केलें.
चवकशे मजगतीं, दुबावीत जेलगार्ड गावडे हांणी उक्तें केलें, हो ड्रग्ज ताका योगेश पागी (रा. आगोंद, काणकोण) हांणी कैदी विकट भगत हाका पुरोवपा खातीर दिल्लो. हे म्हायतीच्या आदारार पुलिसांनी २५ जुनाक आरोपी पागी हाका अटक केली आनी उपरांत कैदी विकट भगत हाकाय ताब्यांत घेतलें.
तपासांत अशेंय उक्तें जालें, कैदी भगत हांणी ड्रग्ज तस्करी खातीर पॅडलर योगेश पागी हांचे कडेन संपर्क करपा खातीर ज्या मोबायल सिमचो वापर केल्लो, तें सीम केसरकार नांवाच्या मनशाच्या नांवार आशिल्लें आनी तें २०१७ वर्सा हरमला शेणिल्लें. तेन्नाचे पुलीस निरीक्षक सोमनाथ माजीक हांच्या मार्गदर्शना खाला उपनिरीक्षक कुणाल नायक हांणी ह्या गुन्यांवाचो तपास करून न्यायालयांत आरोपपत्र सादर केल्लें. न्यायालयांत सरकारी पक्षा वतीन सरकारी वकील एस. सावंत हांणी, जाल्यार दुबावितांचे वतीन ऍड. ए. गवंडळकार, ऍड. एम. नाझारेथ आनी ऍड. व्ही. वालादारीस हांणी युक्तिवाद केलो. आतां आरोप निश्‍चीत जाल्ल्यान ह्या प्रकरणाची नियमीत सुनावणी बेगीनूच सुरू जातली.