भांगरभूंय | प्रतिनिधी
गोंय हें देश आनी विदेश पांवड्या वयलें पर्यटन थळ. म्हणटकच हांगा कितेंय खट, खुट जालें काय तें गाजता. तातूंत विदेशी नागरीक घुस्पल्लो आसल्यार सड्यार उजो फाफसुचो, तशें खिणाभर ते सगल्याक पातळटा. लोक गोंयचेर तुटून पडटात. मागीर गोंयकारांची चूक आसूं वा नासूं! सामान्य भौसान, वेवसायिकान, सरकारी यंत्रणांनी हें घट किंरवटेक गांठ मारून दवरपाक जाय. कारण गोंय हें पर्यटन राज्य. बदनामी जावप म्हणल्यार पर्यटनाचेर परिणाम. तातूंत गोंय लोकप्रीय आशिल्ल्यान परप्रांतियांक हे भुंये विशीं एक प्रकारचो दुस्वास आसूं येता, ताका लागून ते आयिल्ली संद सोडिनात आनी गोंयच्या नांवान शिमगो करतात. पूण तातूंत तांची चूक आसताच अशें ना. कारण पुरावे आसतात.
हालींच दोडामार्ग (गोंय) नाक्याचेर पुलिसांनी पयशे मागले. पूण पावती दिवंक ना, म्हूण आपलो आनी तांचो वाद जालो. हे पुलीस पयशे घेतात तो व्हिडियो आसा, अशें तो काडपी अॅड. संतोष मळवीकर (कोल्हापूर) हांणी सांगलें. काल तांणी आझाद मैदानाचेर पत्रकारांक आपोवन ही म्हायती दिली.तांणी जें कितें सांगलें, ते भोवतेकांचे नदरेन सदचीच गजाल आसुये, पूण कायद्याचे नदरेन तें चूक. म्हणटकच दोशींक ख्यास्त ही जांवकूच जाय. ड्रायव्हींग लायसन्स नाशिल्ल्यान तालांव भरचो पडलो. तांणी तो भरलो, पूण पावती मागूनय मेळूंक ना. पयशे घेवपी दोगा पुलिसांच्या गणभेसाचेर नांवाची पट्टी नाशिल्ली. ती तांणी बोल्सांत दवरिल्ली. उपरांत वाद जातकच लायली. एकलो सिव्हील ड्रेसांत आशिल्लो. व्हिडियोंत हें दिसता. हाचो नेमको अर्थ कितें, ताची जाप पुलीस यंत्रणेन दिवपाक जाय. गणभेसांत नाशिल्लो तो पुलीस काय सामान्य नागरीक? तालांव दिता थंय तो कित्याक? सांजवेळा परत वतना हेच पुलीस कर्नाटकाच्या तरणाट्यांक बडयतना दिसले खंय? ते नशेंत आशिल्ले जाल्यार तांकां बंदखणींत घालपाचे. अल्कोमिटर लावन तपासणी करपाची. कोणाक बडोवपाचो हक्क कायदो दिना. वाद जालो तरी! तांचो ड्रायव्हर पियेवंक नाशिल्लो, ताचे कडेन सगलीं कागदां आशिल्लीं, अशें अॅड. मळवीकर म्हणटात. मागीर पुलिसांचो त्या तरणाट्यां कडेन वाद कित्याक जालो? ते व्हडल्यान ‘हेल्प, हेल्प’ अशें कित्याक आड्डूंक लागले? पत्रकार परिशदेंत अॅड. मळवीकर म्हणटात, ‘म्हाल व्हरपी ट्रकाक तीन कडेन आडावन पावती दिनासतना पयशे घेतले जाल्यार ताका हजार, देड हजार वांटचे पडटले.’ हें खंयच्या कायद्यांत बसता? जें कितें जालें, तें पुलीस यंत्रणे वांगडाच गोंयांक लज करपी. सोशल मिडिया वरवीं हो प्रकार महाराष्ट्रांतल्या सगल्या लोकां मेरेन पावला. ताचेर आडवे उदारे कमेंट मारप्यांचो आंकडो चड आसा. आमचेच यंत्रणेचे चुकीक लागून आमी गोंयकारांनी आपल्याच पांयांर फांतर मारून घेवपा सारकी ही कृती जाली ना?
भ्रश्टाचार, गैरकारभार हो देशाक लागिल्लो रोटो. कामधंदो करीनासतना बरेच जाण करोडांनी जोडटात. थोडे पगाराक हात पसून लायनात खंय. भायले भायर तांचें सुट्टा आसतलें. हो जमानो मोबायल फोनाचो. म्हणटकच दरेकल्यान सीसीटीव्ही कॅमेऱ्या सारको मोबायल फोनांचो वापर करचो. पयशां खातीर आशेल्ल्या दळडिऱ्यांक धरचे. तांकां ख्यास्त जावची म्हूण यत्न करचे. चेक पोस्टाचेर पयशे मागप हो संविधानाचो अपमान. तशे कोण सांपडल्यार तपास यंत्रणांक कागाळ करपाक जाय. चेक पोस्टांचेर सीसीटीव्ही, पुलीस कर्मचाऱ्या कडेन बाॅडी कॅमेरा आसपाक जाय. प्रत्येक तालांव प्रक्रिया पूर्णपणान कॅमेऱ्या मुखार जावची. समाजसेवी संस्थांनी अदीमदीं ट्रक ड्रायव्हरांच्यो ह्यो असल्यो समस्या जाणून घेवपाक जाय. चुकीचें कितें जाता जाल्यार बडी मारपाक जाय.
सरकारी यंत्रणां पारदर्शक करपाक आतां सगल्यांकूच उपाय, येवजण्यो आंखच्यो पडटल्यो, अशें दिसता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
