भांगरभूंय | प्रतिनिधी
गृह मंत्री अमीत शाह आक्रमक
मरण आयिल्ल्यांक दिली भुजवण
आतंकवादा आड भारताची लडाय संवसाराक मान्य
खबरां संस्था
नवी दिल्ली : कोणूच हल्ल्या विशीं विचार करपाचें धाडस लेगीत करचें न्हय असो संदेश दिवपी ख्यास्त दिल्ली स्फोटांतल्या हल्लेखोरांक दितले, अशें केंद्रीय गृह मंत्री शाह हांणी बिरेस्तारा सांगलें. गुजरातांतल्या मेहसाणा जिल्ह्यांतल्या बोरियावी गांवांत मोतीभाई आर. चौधरी सागर सैनीक स्कूल आनी सागर ऑर्गेनीक प्लांटाचें उक्तावण कार्यावळींत व्हिडियो लिंका वरवीं संबोधीत केलें. ह्या वेळार तांणी ही शिटकावणी दिली.
शाह हांणी सांगलें, ही भिजूड घडणूक जांणी घडोवन हाडली आनी जे हाच्या फाटल्यान आसात, तांकां कायद्याच्या पांजऱ्यात हाडटले आनी खरांतली खर ख्यास्त दितले. भारत सरकार आनी गृह मंत्रालय हाचे खातीर पुराय बांदील आसा. तांणी स्फोटांत मरण आयिल्ल्या लोकांच्या घरच्यांक काळजा सावन भुजवण दिली.
ह्या आतंकवादी हल्ल्यांतल्या सगल्या जापसालदार लोकांक खर ख्यास्त दिवपाचो प्रधानमंत्री नरेंद्र मोदी हांणी निश्चेव केला. प्रधानमंत्री मोदी हांच्या फुडारपणा खाला फाटल्या 11 वर्सांत आतंकवादा आड भारताची लडाय पुराय संवसारान मानून घेतल्या. मोदी ह्या वैश्वीक संघर्शांत म्हत्वाची भुमिका करतात, अशें गृह मंत्र्यान सांगलें.
पुलिशेच्या सुत्रां प्रमाण, सोमारा सांजे वेळार लाल किल्या कडेन एक धवी हुंडाय आय- 20 मोटारींत स्फोट जाल्लो. तातूंत 13 जाणांक मरण आयलें आनी 20 जाण जखमी जाल्ले. मुळाव्या तपासांत आनीक एक दुबावीत गाडी चलयतालो. तपास पंगडान फरीदाबाद जिह्यांतल्यान ही दुसरी गाडी, एक तांबडी फोर्ड इकोस्पोर्ट जप्त करपाक येस मेळयलां.
मजगतीं, पुलिसांनी फरीदाबाद सावन ह्या प्रकरणा कडेन संबंदीत तिसरी ब्रेझा मोटार जप्त केल्या. ती अल-फलाह विद्यापिठाच्या भितरल्यान जप्त केल्या. ही मोटार महिला आतंकवादी डॉ. शाहिनच्या नांवाचेर आशिल्ल्याची खबर मेळ्ळ्या. हरियाणा पुलिसांचो बॉम्ब सोदपी पंगड मोटारीची चवकशी करता. ह्या प्रकरणा कडेन संबंदीत चवथी स्विफ्ट डिझायर मोटार लेगीत पुलीस सोदतात.
सुत्रांनी दिल्ले म्हायती प्रमाण, बेपत्ता तिसरे मोटारीचो वापर दुबावितांनी रेकी केले उपरांत थंयच्यान पळून वचपा खातीर केल्लो आसपाक जाय. ह्या दुबावा वयल्यान दिल्ली पुलीस आनी हेर सुरक्षा यंत्रणांनी हे मारुती ब्रेजाचो सोद घेवचे खातीर दिल्ली- एनसीआर आनी भोंवतणच्या राज्यांनी खर तपास मोहीन हातांत घेतल्या. हे फाटभुंयेर आतां दिल्लींत सुरक्षा वेवस्था आनी खर केल्या तशेंच हाय अलर्ट जारी केला.
धवो आतंकवाद : दोतोरांक धरप चालूच
दिल्लींतल्या भिरांकूळ बॉम्बस्फोट प्रकरणाच्या तपासांत ‘व्हायट कॉलर नेटवर्का’चो खुलासो जाला. ह्या प्रकरणांत आतां मेरेन चार दोतोरांक ताब्यांत घेतल्यात. पांचवो दोतोर स्फोटांत मेला. मजगतीं, आतां ह्या प्रकरणांत पुलिसांनी आनीक एका दोतोराक ताब्यांत घेतला. दिल्ली पुलिसांनी उत्तर प्रदेशांतल्या हापूड जिल्ह्यांतल्या जी. एस. मेडिकल कॉलेजींतल्या प्रसुती विभागांतसो सहाय्यक प्राध्यापक डॉ. फारूक हाका ताब्यांत घेतला. आतां मेरेन अटक जाल्ल्या अल-फलाह विद्यापिठांतले डॉ. मुजम्मील गनई, ताची इश्टीण डॉ. शाहीन शाहीद, सहरनपूरांतल्या फेमस हॉस्पिटलाचो डॉ. आदील अहमद राठार, तशेंच डॉ. शाहिनचो भाव डॉ. परवेज अन्सारी हांचो आस्पाव आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
