भांगरभूंय | प्रतिनिधी
पुतांनी सोडल्या वाऱ्यार ; ताकतिकेन गरजेची मजत करपाची ड्रेगाची मागणी
भांगरभूंय । प्रतिनिधी
पणजी : सराकारी घाळपणां उक्ताडार हाडपी कमला नायक हे सांताक्रुझचे दिव्यांग जाण्टे बायलेची व्यथा काळीज हालोवपी आसा. ही बायल फक्त नांवा पुरती जिवी आसा. कसलेंच वळखपत्र आनी आलाशिरो नाशिल्ल्यान हे बायलेचें अस्तित्व ना जालां. पयलीं भुरग्यांनी तिका सोडली, आतां सरकारी यंत्रणेनूय तिचेर आडनदर केल्या. हे बायलेक न्याय मेळोवन दिवपाची मागणी गोंय दिव्यांग हक्क संघटणेचे (ड्रेग) अध्यक्ष आवेलिनो डिसोझा हांणी केल्या.
नायक हे बायले कडेन मुळावे अधिकार दिवपी आधार कार्ड, दिव्यांग प्रमाणपत्र, दयानंद समाजीक येवजणेचे कसलींच कादगपत्रां नात. ही बायल आपले दीस कशे भशेन काडपा खातीर सांताक्रुझ वाठारांत भोंवता. रावपाक धड आलाशिरो लेगीत नाशिल्ल्यान तिची जीण कठीण जाल्या. हे बायलेचें जाण्टेपण आनी दिव्यांगपणाक बेजारून तिच्या पुतांनीच तिका बेवारस सोडून दिल्या.
तिची ही व्यथा पळोवन ड्रेगान तिडक उक्तायल्या आनी सरकारान बेगोबेग हे गजालींत लक्ष घालचें, अशी मागणी केल्या.
दिव्यांग व्यक्ती हक्क कायदो 2016 चें उल्लंघन केल्ल्याचो ठपको दवरून ड्रेगान सांताक्रुझ पंचायत आनी स्वयंपूर्ण मित्रा आड राज्य दिव्यांग आयुक्ता कडेन कागाळ नोंद केल्या. थळावे पंचायतीन हे बायले कडेन आडनदर करून भेदभाव केला देखून नायक हिका बेगोबेग थाकाय दिवची आनी हाच्या फाटल्यान जापसालदार आशिल्ल्या अधिकाऱ्यांचेर कारवाय करपाची मागणी केल्ल्याचें आवेलिनो डिसा हांणी सांगलें.
ही एक सादी गजाल न्हय. जे दुबळे आसात तांचे खातीर आमचे यत्न कशे अपेशी थारतात हाची ती गवाय दिता. कमला नायक हिची परिस्थिती एक आडवाद जावपाक शकना. दिव्यांग व्यक्ती आड सरकारी यंत्रणेच्या घाळपणाची ही देख आसा, अशें डिसा हांणी सांगलें.
हाचे फुडें जर दिव्यांग व्यक्ती आड आडनदर जाली जाल्यार हाचे कायदेशीर परिणाम भोगचे पडटले. अधिकाऱ्यांनी आतांच पावलां उबारून तिची वळख पटोवन दिवपी कागदपत्रां तयार करचीं आनी फावो ती मजत करची. दिव्यांग हक्क आयुक्तान ह्या प्रकरणाचो नियाळ घेवन नायक हिचे आधार कार्ड, दिव्यांग प्रमाणपत्र आनी समाजीक येवजणेचे लाव परत मेळोवन दिवचे. तशेंच दिव्यांग हक्क कायद्या खाला आपली लागणूक पुराय करपाक अपेशी थारिल्ले व्यक्तींचेर कारवाय करची, अशी मागणी डिसा हांणी केल्या.
अधिकाऱ्यांनी केली मजत
म्हायती मेळटाच अधिकाऱ्यांनी कमला नायक हांची कालापुर तिच्या घरा कडेन भेट घेतली. तातूंत दिसून आयलें, तिचे कडेन आधार कार्ड आसा, पूण तें सक्रीय मोबायल नंबरा कडेन लींक ना. अधिकाऱ्यांनी कमला हिका आधार कार्ड मोबायल नंबराक लींक करपाक मजत केली. नायक हिचे कडेन समाज कल्याण खात्यान जारी केल्लें वरिश्ठ नागरीक कार्ड, राशन कार्ड, मतदार वळखपत्र आनी कॅनेरा बँकेंत खातें आशिल्ल्याचें दिसून आयलें. ह्या वेळार स्वयंपूर्ण मित्र, पंचायत सचीव, थळावे बीएलओ, समाज कल्याण अधिकारी, नागरी पुरवण अधिकारी, कॅनेरा बँकेचे अधिकारी आनी ड्रेगाचे अध्यक्ष हजर आसले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
