भांगरभूंय | प्रतिनिधी
उत्तर गोंय रेंट अ कार संघटेनेची मागणी
पणजीः राज्यांत व्हडो प्रमाणांत खाजगी गाडयो आनी टॅक्सीच्यो पल्टी नंबर प्लेट आशिल्ल्यो गाडयो रेंट अ कॅब म्हण भाड्याक चलतात. ह्या बेकायदेशीर गाडयांक लागून राज्यांत अपघात आनी गुन्यांवकारी घडणुको जातात. मात दोश रेंट अ कार ओपरेटर्सांचेर येता. देखून सरकारान ह्या गाडयांचेर कारवाय सुरू करची, अशी मागणी उत्तर गोंय रेंट अ कॅब धनी संघटेणेचे अध्यक्ष नितेश चोडणकार हांणी केली.
रेंट अ कॅब संघटणेच्या वांगड्यांचे एका शिष्टमंडळान पणजे येरादारी खात्यांत आनी अंमलबजावणी विभागाच्या अधिकार्यांची भेट घेतली. भेटी उपरांत उलयतना चोडणकार हांणी सांगलें, खाजगी गाड्यो तळे आनी टॅक्सीची पल्टी नंबर प्लेट मारून खुपश्यो बेकादेशीर रितीन गाडयो चलतात हो विशय तांणी मांडलो.
ज्यो टॅक्सी आसात तांचे नंबर प्लेटींचें रुपांतर करून ते पल्टी नंबर प्लेट लावन रेंट अ कार म्हण सांगता. मात ती रेंट अ कार न्हय. हें दिसा उजवाडा जावपी गुन्यांवकारी घडणूको आनी आनी अपघातांनी वाड ही खाजगी आनी पल्टी नंबर प्लेट आशिल्ल्या गाड्यांक लागून जाल्यात. पूण रेंट अ कार धनयांचेर लोक बोटां दाखयतात, अशें चोडणकार हांणी सांगलें.
गाडी सोरो पियेवन चलोवपाच्यो घडणुको बरे भशेन नियंत्रणांत आयल्यात. कळंगुटे सयत लागसारच्या वाठारांतल्या पुलीस स्टेशनांनी नाकाबंदी घातल्या. हातूंत रेंट अ कार घेवन नेटान गाडी चलोवप, सोरो पियेवप हे घडणुकांचेर नियंत्रण आयलां. मात खाजगी गाडयांचेर कसलीच कारवाय जायना. त्यो बिनधास्त भाड्याक चलतात, असो आरोप चोडणकार हांणी केलो.
आपल्या पंगडा वांगडा बसून कारवाय करपाक सुरू करपाचें आस्वासन आमकां अधिकार्यांनी दिलां. २ हजार परस चड खाजगी वाहनां आनी पल्टी नंबर प्लेट गाडयो राज्यांत भाड्याचेर चलतात, अशें चोडणकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
