भांगरभूंय | प्रतिनिधी
पणजी : शेतकर्यांवेलो रिणाचो भार उणो करप, व्याज अनुदान दिवन चडांत चड लोकांक शेतीकडेन आकर्शीत करचे खातीर, शेतकी खात्यान शेतकारां खातीर व्याज अनुदान येवजण जाहीर केल्या. ते प्रमाण शेतकरांक तांणी काडिल्ल्या लघु आनी दीर्घ काळाच्या अनुक्रमान ३ आनी ५ लाख रुपयां मेरेनच्या कर्जावेल्या व्याजा खातीर ४ टक्के अनुदान दितले. वेळार रिणांचे हप्ते भरपी शेतकार्यांकूच हे येवजणेचो लाव घेवपाक मेळटलो. येवजणेचो काळ ३१ मार्च २०२८ मेरेन आसतलो.
कृषी खात्यान जारी केल्ले अधिसुचवणे प्रमाण, ही येवजण सगल्यो शेड्युल बँको, लघु वित्तीय बँको, गोंय सहकारी बँक तशेंच मुळावी कृषी सहकारी संस्था (पॅक्स) हातुंतल्यान घेतिल्ल्या रिणा खातीर ही येवजण लागू आसतली. येवजणेचो लाव शेतकारां सयत , पशु संवर्धन, नुस्तेंमार्यांकूय घेवपाक मेळटलो. ५ लाख रुपयां मेरेनचो चडांत चड काळ ५ वर्सां आसप गरजेचें. कर्जदारान सगले हप्ते वेळार भरले आनी हेर अटी पुराय केल्यार सरकार चडांत चड ५ वर्सां मेरेन व्याज अनुदान दितलें. येवजणेचो लाव घेवपा विशीं वित्तीय संस्थांच्या मुखेल्यांनी दर स म्हयन्यांनी कृषी खात्याकडेन अर्ज करप गरजेचें.
लघु कर्जांत बियाणें, सारें, सिंचन, किड नाशक, कामगार, कापणी, मार्केटिंग अश्या खुबश्या गजालींचो आसपाव आसतलो. पशु संवर्धन विभागांत जनावरां खातीर चारो, जेवण, वैजकी उपचार, वीज आनी उदकाचें बील हाचो आसपाव आसा. जाल्यार नुस्तेंमार विभागांत इंधन, कामगार, लोडिंग शुल्काचो आसपाव आसा. दीर्घ काळाच्या रिणांत जमीन उदरगत, दुरीग घालप अश्या जायत्या गजालींचो आसपाव आसा. हातुंत पशुसंवर्धन आनी नुस्तेंमार रिणा विशींच्यो अटी हे संबंदीत खातें तयार करतलें. येवजणेचेर जिल्लो तशेंच विभागीय कृषी अधिकारी देखरेख दवरतलें अशें अधिसूचवणेंत म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
