भांगरभूंय | प्रतिनिधी
पुलीस, बजरंग दल, डीएसपीसीए, ध्यान फावंडेशना वतीन जिवदान
मडगांव : नुवेंच्या महामार्गार रातीं व्हड कंटेनराच्या धपक्यान दोन म्हशी जखमी जाल्यो. हातुंतली एक म्हस गाबणी आसा. मायणा कुडतरी पुलीस, बजरंग दळ, डीएसपीसीए हांणी म्हशींक कुशीक काडून तांकां उदक दिलें. उपरांत तांकां सांबाळपा खातीर ध्यान फावंडेशनाच्या ताब्यांत दिलीं.
नुवेंच्या महामार्गार कांय सुवातांचेर रस्त्यावेले दिवे बंद आसात. तशेंच सिग्नलांय सुरू ना. रातचो प्रवास करपी गाडयांक रस्त्या मदींच आयिल्ल्या जनावरांचो अदमास येना आनी ते तांकां धपको दितात. तशेंच ज्या म्हसरांक अपघात जाला तांकां टॅगींग करूंक ना.
बजरंग दळाच्या एका तरणाट्यान हो अपघात पळोवन मायणा कुडतरी पुलिसांक कळयलें. उपरांत जनावरां क्रुरताय प्रतिबंधक समिती दक्षीण गोंय हांचे अधिकारी राज प्रतीक, हांचे सयत बजरंग दळाचे कार्यकर्ते घडणुके सुवातेर दाखल जाले. जखमी म्हशींक रस्त्यावेल्यान कुशीक काडून उदक दिलें. उपरांत ध्यान फावंडेशन हे संस्थेच्या गाडयेंतल्यान दोनूय म्हशींक गोशाळेंत धाडल्यो. बजरंग दळाच्या कार्यकर्त्यांक महामार्गावेल्या लायटीं वांगडा सिग्नल यंत्रणां सुरळीत करपाचेर लक्ष दिवपाची मागणी केली. तशेंच जनावरांच्या धनयांनीय गोरवांक रातच्या वेळार अशे तरेन मेकळीं सोडचीं न्हय म्हणून उलो मारलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
