भांगरभूंय | प्रतिनिधी
धुदुर्ग वाठारांतल्या आरवली गांवांत एका दसका पयलीं पळयिल्ल्या एका सुंदर सपनाची पूर्ती जाली. उद्देगपती अवधुतबाब तिंबलो आनी तांच्या घराब्यान पळयिल्लें हे सपनपूर्तीक आशिर्वाद दिवपाक श्रीसंस्थान गोकर्ण पर्तगाळ जिवोत्तम मठाचे श्रीमद् विद्याधीश तिर्थ श्रीपाद वडेर स्वामी हाजीर आशिल्ले.
तिंबलोबाब आनी तांचो घराबो फाटल्या जायत्या पिळग्यां सावन समाजीक कार्यांत अग्रेसर आसात. असोळणे हो तांचो मूळ गांव. मडकयची श्रीनवदुर्गा ही कुळदेवी. थंयचो मंडप बांदून तो देवीक समर्पित करपाचें काम तांच्या जाण्ट्यांनी केलां. विवीध वेवसायांत ते आसात. मात ते सदांच प्रसिद्धी पसून पयस रावतात.
आरवलीच्या सैम सुंदर प्रदेशांत पर्यावरणाचें भान राखून केल्ल्या प्रकल्पाक स्वाम्यांनी आशिर्वाद दिवचे अशें तांकां दिशिल्ले. तांणी तीन म्हयन्यां फाटीं स्वाम्यांच्या वाराणसीच्या चातुर्मास वास्तव्यांत तशेंच दिल्लीच्या राबित्यांक तांची भेट घेतिल्ली. हो प्रकल्प पूर्ण जालो. 29 आॅक्टोबराक आराकिलाच्या भव्य वास्तूंत निर्माण केल्ल्या जिवोत्तम मठाचे प्रतिकृतींत प. पू. स्वाम्यांचें आगमन जालें. तांच्या पवित्र वास्तव्याचो सुखद अणभव घेवपाची एक दुर्मीळ संद म्हाका आनी म्हज्या कुटुंबाकूय मेळ्ळी, हें म्हजें भाग्य. स्वामीजींक सगल्यांनी येवकार दिलो. तांची पाद्यपूजा केली. 30 आॅक्टोबराक सकाळीं स्वामीजींन वीर विठ्ठलाची पूजा केली. दनपरां आरती जाली. सावंतवाडी, आरवली आनी हेर वाठारांतल्यान खास आमंत्रणा वयल्यान जायते मानेस्त आयिल्ले. गोंयच्यान उद्देगपती धेंपो, साळगांवकार कुटूंब, मठ, देवळांच्या समित्यांचे जाळवणदार हाजीर आशिल्ले. जिवोत्तम मंडपाच्या प्रतिकृतींत प्रवीण गांवकार आनी तांच्या शिश्यांची सुगम संगीत गायनाची कार्यावळ जाली. सांजवेळा सातांक स्वामीजींचें मंडपांत आगमन जालें. ह्या वेळार सगले मानेस्त हाजीर आशिल्ले. कार्यावळ सोंपतकच स्वाम्यान वीर विठ्ठलाची सांजवेळची पुजा केली. उपरांत मुख्यमंत्री डाॅ. प्रमोद सावंत हांचें आगमन जालें. तांणी स्वाम्यांचे आशिर्वाद घेतले. बांदकाम मंत्री दिगंबर कामतूय आयले.
पर्तगाळाच्या मठाक 550 वर्सां पूर्ण जाल्ल्याचें ह्या वेळार स्वाम्यांनी घोशीत केलें. 28 नोव्हेंबराक प्रधानमंत्री नरेंद्र मोदी उडुपी मार्गान पर्तगाळी मठात येवपाचे आसात. थंय रामाचे मुर्तीचें लोकार्पण जातलें.
31 वेर सकाळीं सातांक स्वामीजीन जलसंचारा खातीर भायर सरले. तांचे वांगडा मानेस्तांनीय फेरी मारली. ह्या वेळार स्वाम्यांक ह्या वाठाराची म्हायती घेतली. तांणी सांगलें, ‘मनशान सदांच सुर्योदय पळोवपाक, अणभवपाक जाय. ताका लागून मनांत सकारात्मकताय, उर्जा निर्माण जाता. पूण, लोकांक सुर्यास्त आवडटा. तो तांच्या मनांत नकारात्मकताय, उदासिनताय निर्माण करता.’ हांगाच्यान दर्या आनी न्हंयांचें तातूंत मिलन जावपाचें दुर्मीळ दृश्य उंच पठारा वयल्यान दिसतालें. ड्रोना वरवीं हाचें शूटिंग जालें. दनपरां स्वामीजींची पाद्यपूजा जाली. प्रवीण गांवकार आनी शिश्यांची भक्तीसंगीताची कार्यावळ जाली. उपरांत स्वाम्याचें आशिर्वादपर उलोवप जालें. तांणी एका संस्कृत वचनाचो आदार घेवन मार्ग, वस्त्र, पयशे आनी येश मेळोवपाक खूब कश्ट काडचे पडटात आनी ते रोखडेंच मेळना अशें सांगलें. अवधूतबाब तिंबलो हांणी प्रकल्पा विशीं म्हायती दिली. कांय शेंकड्यां पयलीं पारशी गुजरातचे दर्यादेगेर कशे आयले आनी थंय आसरो दिवपाची विनवणी केली. राजाक लोकसंख्या वाडपाक नाका आशिल्ली. तांणे दुदाचो भरिल्लो ग्लास हाडलो आनी हातूंत आनीक जागो ना अशें सांगलें. पारश्यांनी तांकां साकर हाडपाक सांगली आनी ती भितर घाली. दुदाचो थेंबूय सकयल पडलो ना. तुमचो समाज आमी असोच गोड करतले अशें तांणी राजाक सांगलें. हांवे स्वता ह्या सुत्राचो जिवितात कसो अवलंब केला, तें श्री. तिंबलो हांणी सांगलें. 1 नोव्हेंबराक वीर विठ्ठलाची पूजा, महाप्रसाद जालो आनी स्वामीजींचें निर्गमन जालें.
तीन दिसांच्या तांच्या वास्तव्यांत पवित्र, सकारात्मक प्रेरणा मेळ्ळी. ताची उर्जा घेवन दरेकल्यान मुखार वचपाक जाय. म्हज्या स्वताच्या आयुश्यांत हे तीन दीस सुखद आशिल्ले. परमपूज्य स्वामीजींच्या पवित्र अस्तित्वाचो सहवास, पंचमहाभुतांचो (उदक, मळब, तेज, वायु आनी पृथ्वी) सहवास हांणी आराकिलाच्या वास्तव्याचो एक आगळो अणभव मेळ्ळो. सगल्यांची उत्तरोत्तर उदरगत जावं, हीच श्रीविठ्ठल चरणी प्रार्थना.
दामोदर भाटकार
9225989111
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
