भांगरभूंय | प्रतिनिधी
पवन खेरा : दुबावितांचीं नांवां जाहीर करपाची मागणी
भांगरभूंय । प्रतिनिधी
पणजी : पुजा नायक हिणें जे मंत्री आनी अधिकाऱ्यांचीं नांवां घेतल्यांत तांकां चवकशी पुराय जाय मेरेन निलंबनाचेर दवरचे. तशेंच ह्या प्रकरणाची न्यायालयीन चवकशी करची. नोकरी घोटाळो हो मुद्दो काँग्रेस संसदेंत व्हरतली, अशें अखील भारतीय काँग्रेस समितीचे फुडारी पवन खेरा हांणी सांगलें.
पणजे काँग्रेस हावसांत आपयिल्ले पत्रकार परिशदेंत पवन खेरा उलयताले. ह्या वेळार गोंय काँग्रेस प्रदेशाध्यक्ष अमीत पाटकार आनी मिडिया चेअरमन अमरनाथ पणजीकर हजर आशिल्ले.
फाटल्या साडे तीन वर्सांत भाजपाचें ट्रिपल इंजीन- केंद्र, राज्य आनी थळावो संस्था सत्तेंत आसतना गोंयांत बेरोजगारी वळेरेंत पयले सुवातेर आसा, अशें निती आयोग म्हणटा, असो आरोप खेरा हांणी केलो.
2017 त भाजपान 50 हजार नोकऱ्यो जाहीर केल्यो. 2022 त 10 हजार नोकऱ्यो जाहीर केलो. पूण दिल्लें आस्वासन पाळिनासतना सरकारान एक घोटाळो केलो. तशेंच फुडें वचून ह्यो नोकऱ्यो विकून व्हडलो घोटळो केलो. पुजा नायक हिणें आपल्या स्टेटमेंटांत नांवां घेतल्यात आसतलीं आनी हो स्टेटमेंट पुलीस तशेंच सरकारा कडेन आसतलोच. हे खातीर ह्या घोटाळ्यांत गुंतिल्ले मंत्री, आयएएस अधिकारी आनी भौशीक बांदकाम खात्याचो वरिश्ठ अधिकार कोण तांची नांवां सरकारान जाहीर करचीं, अशें खेरा हांणी मागलें.
पुजा नायक हांची चवकशी निश्पक्ष जावची हे खातीर ज्या मंत्र्यांचीं आनी अधिकाऱ्यांचीं नांवां नायक हिणें घेतल्यात तांकां चवकशी पुराय जाय मेरेन निलंबीत दवरचे. जर हे मंत्री आनी अधिकारी आपले सत्तेर बसून उरले जाल्यार हे चवकशेंत हस्तक्षेप करून ताची दिशा बदलपाक शकतात. जर मुळावे चवकशेंत ते निर्दोश मेळटात जाल्यार तांकां परतून सेवेंत हाडात, अशी सुचोवणी खेरा हांणी केली.
ह्या प्रकरणाची चवकशी पुलिसां वरवीं करिनासतना ह्या प्रकरणांत एक न्यायीक आयोग स्थापन करचो. निवृत्त न्यायाधिशा खाला न्यायालयीन चवकशी ह्या नोकरी घोटाळ्यांत करची. तशेंच 2019 ते आतां मेरेन ज्यो सरकारी नोकर भरती जाल्यात तांचें ऑडीट करून हे विशींची श्वेत पत्रिका सराकारान जारी करची, अशी मागणी खेरा हांणी केल्या.
हो विशय अखील भारतीय काँग्रेस पांवड्यार घेवचो तशेंच हो विशय संसदेंत व्हरचो अशी मागणी काँग्रेस प्रदेशाध्यक्ष अमीत पाटकार हांणी केली. आमी पाटकार हांची मागणी मान्य केल्या. हो नोकर भरतीचो विशय आमी राष्ट्र पांवड्यार व्हरतले, अशी म्हायती खेरा हांणी दिली.
पुजा नायक प्रकरणांत परतून एफआयर दाखल करतले अशें मुख्यमंत्री डॉ. प्रमोद सावंत सांगता, पूण हो एफआयार नेमको कोणाचेर जातलो हे विशीं मुख्यमंत्र्यान स्पश्टीकरण दिवचें, अशी मागणी पाटकार हांणी केली. फक्त पुजा नायक हांणी 17 कोटी घेतल्यात. ह्या प्रकरणांत 33 जाणांक अटक जाल्ल्या लोकांनी कितले पयशे घेतल्या आसतले? हो 500 ते 600 कोटींचो घोटाळो आसून व्यापम घोटाळ्या परस चड व्हड आसा. जेन्ना इतल्या व्हड पयश्यांचो घोटळा जाता तेन्ना ईडी सुशेगाद आसा आनी फक्त विरोधकांच्या फाटल्यान लागता, असो आरोप पाटकार हांणी केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
