भांगरभूंय | प्रतिनिधी
पणजी : उद्देग खात्या वतीन मुख्यमंत्री स्वयं रोजगार येवजण नव्यान सुरू केल्या. ते प्रमाण फुडलें वर्सभर २९ हजार विद्यार्थ्यांक उद्यमशीलतेचें प्रशिक्षण तशेंच उण्या व्याज दरांत रीण दितले, अशें मुख्यमंत्री डॉ. प्रमोद सावंत हांणी सांगलें. बुधवारा पणजे येवजणेचे उक्तावणाचे कार्यावळींत ते उलयताले.
ह्या वेळार इडीआयआयचे संचालक सुनील शुक्ला, खात्याचे संचालक अश्विन चंद्रू, सचीव संतोष सुखदेव, बी. एस. पै आंगले हाजीर आशिल्ले.
मुख्यमंत्र्यांनी मुखार सांगलें, आदीं गोंयांत सगल्या क्षेत्रांनी उद्यमशीलताय आशिल्ली. मात जसो काळ बदल्लो तशें गोंयकारांनी हे गजाली कडेन आडनदर केली. हाका लागून गोंयच्या हेर राज्यांवेलें अवलंबित्व वाडलें. स्वयंपूर्ण गोंय करपा खातीर सगल्या मळांचेर स्वावलंबी जावप गरजेचें. हाका लागूनच आमी ही येवजण नव्यान सुरू करतात. हाचे वरवीं महाविद्यालयांतल्या विद्यार्थ्यांक आंत्रप्यूनर जावपाचें प्रशिक्षण दितले. हे खातीर गुजरातच्या इडीआयआय संस्थे वांगडा सामंजस्य करार केला. ही संस्था तरणाट्यांक उद्देग, स्टार्ट अप वाठारांत गरजेचें आसपी ज्ञान दितले, अशें तांणी सांगलें.
राज्यांतल्या तरणाट्यांनी फकत नोकरेचो विचार करचो न्हय. हाचे सुवातेर तांणी नोकरी दिवपी करपा खातीर यत्न करपाक जाय. सध्या तशेंच फुडाराकूय राज्यां नोकरी तशेंच उद्दे क्षेत्रांत जायत्यो संदी आसात. थळाव्यांनी ह्यो संदी घेवंक नात, जाल्यार भायले लोक येवन त्यो घेतले. येवजणे वरवीं बायलां आयोजकांकूय विशेश सवलती दितले. येवजणेची अंमलबजावणी ईडीसी वतीन करता. आतां मेरेन सुमार देड हजार विद्यार्थ्यांचें प्रशिक्षण पुराय जालां.
प्राध्यापकांक प्रशिक्षण
ईडीसीचे वेवस्थापकीय संचालक बी एस पै आंगले हांणी, येवजणे खाला विवीध महाविद्यालयांतल्या २०० प्राध्यापकांक कुशळटाय विकास आनी हेर क्षेत्रात प्रशिक्षण दितलें. पयल्या टप्प्यांत ३५ प्राध्यापकांक गुजराताक स दिसांच्या प्रशिक्षणा खातीर धाडटले. प्रशिक्षीत प्राध्यापक विद्यार्थ्यांक बरें मार्गदर्शन करपाक शकता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
