भांगरभूंय | प्रतिनिधी
पेडणें: मोरजी पंचायत वाठारांतल्या दर्यादेगांचेर लागीं सावन बोटी वरवीं नुस्तेमारीचो वेवसाय सुरू आसता. ताका लागून जे थळावे नुस्तेमार ल्हान व्हड्या वरवीं वा रापणे वरवीं नुस्तेमारी करतात तांकां अडचण निर्माण जाता. ह्या प्रस्नाचेर नुस्तेमार मंत्री नीळकंठ हळर्णकार हांणी सांगलें, मोरजे पंचायत वाठारांतल्या नुस्तेमार भावांच्यो समस्या सरकार सोडयतलें. ज्यो बोटी दर्यादेगे सावन लागींच नुस्तेमारी करतात त्या बोटींचेर कारवाय करतले अशें तांणी म्हणलें.
हळर्णकार हरमला भोवउद्देशी नुस्त्या मार्केट प्रकल्पाच्या उक्तावणा वेळार उलयताले. ह्या वेळार आमदार जीत आरोलकार हाजीर आशिल्ले.
मोरजी पंचायत वाठारांतल्या विठ्ठलदासवाडो दर्यादेगेर 50 ते 60 थळावे नुस्तेमार व्हड्यान नुस्तेमारीचो वेवसाय करतात, आनी तांकां व्हडें दवरपा खातीर सुवातूच नासता. परंपरीक पांयवाटो आडावपाचे प्रकार सुरू आसात. ताचेर कशी कारवाय करतले. तशेंच दर्यादेगेर व्हड प्रमाणांत पर्यटन हंगामांत लांकडी बॅडी घालतात. शेंकड्यांनी बॅडी घालून गोंया भायले वेवसायीक दर्यादेगेर अतिक्रमण करतात. ताका लागून नुस्तेमार भावांक तांच्यो व्हडीं, सामान दवरपाक सुवातूच नासता. अशे तरेचे प्रस्न केले उपरांत मंत्री हळर्णकार हांणी सांगलें, नुस्तेमार भावांनी अशे तरेची कागाळ जर आपले कडेन दीत जाल्यार आपूण कारवाय करतलों अशें तांणी म्हणलें.
तांणी मुखार म्हणलें, पर्यटन खात्याची दर्यादेग वाठारांत व्हड प्रमाणांत जमनी आसून त्या जमनीचेर नुस्तेमार भावां खातीर एखादो प्रकल्प वा सुवात आरक्षीत दवरपा खातीर पर्यटन खात्याचो हरकत ना दाखलो गरजेचो आसा. तेप्रमाण आपूण पर्यटन मंत्री रोहन खंवटे हांचे कडेन तशेंच मुख्यमंत्री डॉ. प्रमोद सावंत हांचे कडेन चर्चा करून हो विशय समजिकायेन सोडोवपाचो यत्न करतलों अशें तांणी म्हणलें.
मोरजी पंचायत वाठारांतल्या तशेंच मांद्रें मतदारसंघांतल्या नुस्तेमारांच्यो ज्यो समस्या आसात त्यो सोडोवपा खातीर सरकार यत्न करतलें. नुस्तेमारांक तांच्यो व्हडीं सुरक्षीत दवरपा खातीर रोखडीच शेड उबारून दिवपाची प्रक्रिया सुरू करतले अशें मंत्री निळकंठ हळर्णकार हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
