भांगरभूंय | प्रतिनिधी
कोची ः केरळ विद्यापीठाच्या संस्कृत विभागाच्या मुखेल्यां आड अनुसूचित जातीच्या संशोधकाक जातीवाचक अपमान केल्ल्या प्रकरणांत गुन्यांव दाखल केलो, पुलिसांनी ही म्हायती दिली.
श्रीकरियम पुलिसांनी केरळ विद्यापीठाच्या करियावत्तम कॅम्पसांतले संस्कृत विभाग मुखेली आनी फॅकल्टी ऑफ ओरियेंटल स्टडीजचे डीन सी.एन. विजयकुमारी हांचे आड गुन्यांव दाखल केला. ही कारवाय संशोधक विपीन विजयन (वंचियूर) हांचे कागाळी वेल्यान केल्या. ते संस्कृत विभागांत संशोधन करतात.
एफआयआर प्रमाण, १५ ऑक्टोबराक जाल्ल्या तांच्या ओपन डिफेन्स उपरांत विजयकुमारी हांणी विजयन हांच्या थिसिसचेर सय करपाक न्हयकार दिलो. उपरांत विजयन हांणी परत तांकां मेळून सय करपाची मागणी केली तेन्ना विजयकुमारी हांणी हेर शिक्षक आनी विद्यार्थ्यां मुखार जातीवाचक वक्तव्यां केल्ल्याचो आरोप आसा.
कागाळींत अशेंय म्हणलां, २०१५ सावन जेन्ना विजयन हांणी तांच्याच मार्गदर्शना खाला एम.फिल. सुरू केलें, तेन्ना सावन विजयकुमारीक जातीय थोमणे मारपाची संवय आसा.
एफआयआरांत नमूद आसा, विजयकुमारी हांणी विजयन हांकां सांगिल्लें, सकयले जातींतले लोक संस्कृत शिकपाक शकनात. तशेंच ते भितर आयले काय हांव म्हजी कूड उदकान धुतलों, अशेंय तांणी सांगलें.
मजगतीं, विजयकुमारी हांणी सगले आरोप न्हयकारल्यात. तिणें स्पश्ट करतना म्हणलें, संशोधकांच्या प्रबंधांत गंभीर शिक्षणीक त्रुटी आसात आनी तांचें संस्कृतीवेलें ज्ञान आपुर्ण आशिल्ल्यान तांणी सय करपाक न्हयकार दिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
