भांगरभूंय | प्रतिनिधी
मडगांव : फातोड्ड्यां वाठारांत बिबटो भोंवता असो फोटो व्हायरल जाता. हे विशीं रान खात्यान केल्ले चवकशेंत उत्तरप्रदेशांतल्या गौतम कुमार हांणी अशेंच मजे खातीर हो प्रकार केल्ल्याचें सांगलें. रान खात्यान ताचो मोबायल जप्त केला.
फातोड्ड्यां वाठारांतल्या दक्षीण गोंय जिल्लो हॉस्पिटल आनी आमदार विजय सरदेसाय हांच्या घरा लागसारच्या वाठारांत बिबटो भोंविल्ल्याचे फोटो आयतार सोशियल मिडियाचेर व्हायरल जाल्ले. हे विशीं नागरिकांक काळजी घेवची म्हूण उलोय मारिल्लो. हाचे उपरांत आमदार विजय सरदेसाय हांणी रान खात्याच्या अधिकार्यांक हे विशीं कळोवन हे घडणुकेची चवकशी करची अशी सुचवणी केल्ली. उपरांत रान खात्यान केल्ले चवकशेंत बिबटो फातोड्ड्यां वाठारांत आयिल्ल्याच्यो कसल्योच खुणो सांपडूंक ना. हो फोटो खंयच्यान आयलो हाचो तपास केलो तेन्ना मूळ उत्तरप्रदेशांतलो गौतम कुमार हांणी हे सुवातेचे फोटो आपल्या इश्टाक धाडून ते सुवातेर बिबट्याचो फोटो एडीट करून घेतिल्ल्याचें मुखार आयलें. रान खात्यान गौतम कुमारचो मोबायल तपासलो तेन्ना हो सगलो प्रकार समजलो. ह्या वाठारांत बिबटो भोंवता, ही खबर फटींग आशिल्ल्याचें समजलें.
रान खात्यान गौतम कुमार हाचें आधारकार्ड घेवन मोबायल जप्त केलो. गौतम कुमार हांणी हो हें सगलें आपणें केल्ल्याचें मानून, फकत मजे खातीर हें केल्लें. इश्टा कडल्यान फोटो एडीट करून घेतलो आनी सोशल मिडियाचेर घालो. हाका लागून इतलें जातलें हाची कल्पना नाशिल्ली अशेंय तांणी सांगलें.
रान खात्याच्या अधिकार्यांनी अशे तरेच्या एआय जनरेटेड आनी एडिट फोटवांक लागून भंय पातळटा. हाका लागून अशे तरेची कसलीच म्हायत सोशल मिडियाचेर पातळची न्हय असो उलो मारलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
