भांगरभूंय | प्रतिनिधी
भारताची पयल्या क्रमांकाची तलवारबाज भवानी देवीन लंडनांत चालू आशिल्ले राष्ट्रकूल तलवारबाजी वस्तादपण सर्तींत भांगरा पदक जिखलें. तिणें फाटले खेपे लेगीत भांगरा पदक जिखिल्लें.
संवसारीक क्रमवारींत 42वे सुवातेर आशिल्ले 28 वर्सां पिरायेचे भवानी देवीन सेवर श्रेणींतले फायनलींत दुसरे सुवातेर आशिल्ले ऑस्ट्रेलियेचे व्हॅरोनिका व्हॅसिलेवाक 15-10 अशा फरकांनी हारयली.
भवानी देवीन अंदूंच्या हंगामाक इस्तांबुलांतल्या संवसारीक सर्ती पसून सुरवात केल्ली. पूण, तिका 23वे सुवातेर समाधान मानचें पडिल्लें. ते उपरांत भवानी देवीन कायरोंत जाल्ले संवसारीक वस्तादपण सर्तींत वांटो घेतलो. पूण, थंय तिचें आव्हान दुसरे फेरये उपरांत सोंपलें. राष्ट्रकूल तलवारबाजी सर्त ही तिची वर्सांतली 10वी सर्त आशिल्ली.
फायनल सामकी कठीण आशिल्ली. पूण, भारता खातीर दुसरें भांगरा पदक जिखपाची खोशी आसा. अंदूंचें वर्स आपले खातीर बरें गेलें. ही लय मुखार लेगीत कायम राखपाची आसा. भारताच्या लोकां कडल्यान मेळपी तेंको खूब व्हड आसा अशें भवानी देवीन पदक जिखल्या उपरांत पत्रकारां कडेन उलयतना सांगलें.
तलवारबाजीचे सेबर सर्तींत तलवारबाज एकामेकाचे कुडीचेर वार करून गूण मेळयतात. हातूंत भेंडांच्या वयर, मनगटा खेरीत खंयसरूय तलवार लावन गूण मेळोवपाक शकतात.
मजगतीं, भवानी देवी ऑलिम्पिकाक पात्र जावपी भारताची पयली तलवारबाज आसा. आठ खेपे राष्ट्रीय वस्तादपण जोडपी भवानी देवी राष्ट्रकूल वस्तादपण सर्तींत एक रुपें आनी एक कांशें लेगीत जिखल्या. तिणें टोकियो ऑलिम्पिकांत आपली पयली मॅच जिखून सगल्यांत अजापाचो धपको दिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
