भांगरभूंय | प्रतिनिधी
मंत्री गुदिन्हो आनी खासदार फर्नांडीस हांचे एकामेकाचेर आरोप
भांगरभूंय । प्रतिनिधी
वास्को : दाबोळी- बोगमाळो चौक ते एमईएस चौक मेरेन बांदतात तो उड्डाण पूल पंचायत मंत्री मॉवीन गुदिन्हो आनी काँग्रेसीचे खासदार कॅप्टन विरियातो फर्नांडीस हांचे खातीर कळीचो मुद्दो जाला. ह्या उड्डाण पुला वयल्यान दोगूय एकामेकाचेर आरोप करपाक लागल्यात. हो उड्डाण पूल खंयच्या कारणा खातीर बांदतात हाचेर मंत्री गुदिन्हो आनी खासदार फर्नांडीस आपापली बाजू मांडटात. दाबोळी विमानतळ बंद करचे खातीर मंत्री गुदिन्हो हांचे यत्न चल्ल्यात, असो आरोप कॅ. फर्नांडीस करता जाल्यार दाबोळी विमानतळ बंद जावचो ना, जाल्यार ताचो विस्तार लेगीत जातलो अशें मंत्री गुदिन्हो स्पश्ट करता.
मंत्री गुदिन्हो हांणी चार दिसां आदीं एके कार्यावळींत उड्डाण पुला विशीं उलयतना, विरोधकांनी आडमेळीं हाडिल्ल्यान उड्डाण पूल तयार जावपाक कळाव जाता, ना जाल्यार आतां मेरेन 80 टक्के काम पुराय जावपाचें, असो दावो तांणी केल्लो. हाका परती जाप दितना, त्या उड्डाण पुला संबंदांत मंत्री गुदिन्हो दिशाभूल करता, असो दावो कॅ. फर्नांडीस हांणी केलो.
मंत्री केन्ना सांगता, दाबोळी विमानतळा कडेन येवपी- वचपी येरादारी सुरळीत करचे कातीर ह्या पुलाचो वापर करतले, जाल्यार केन्ना सांगता मुरगांव बंदरांतल्या व्हड गाडयांचे सोयी खातीर हो पूल वापरतले अशें सांगता, अशें कॅ. फर्नांडीस हांणी सांगलें.
उड्डाण पुलाच्या कांय खांब्यांची उंचाय निर्दारीत केल्ले उंचाये परस अदीक आशिल्ली. ताका लगून दाबोली विमानतळाचेर विमानां देंवोवपाक पायलट तयार जावचे नाशिल्ले. ताका लागून दाबोळी विमानतळ बंद जावपाचो. पायलट विमानां देंवोवपाक तयार नाशिल्ल्यान दाबोळी विमानतळ बंद जाला, तो बंद करपाक आमी जापसालदार नात, अशें कारण मंत्री गुदिन्हो दिवपाचो, अशें कॅ. फर्नांडीस हांणी सांगलें.
न्यायालयाच्या आदेशा प्रमाण सुमार 17 खांब्यांची उंचाय उणी करपा ते कातरल्लयात. राष्ट्रीय म्हामार्ग प्राधिकरणान तो उड्डाण पूल बांदचे आदीं नौदळाची परवानगी घेवंक नाशिल्ल्यान ही परिस्थिती उप्रासल्या. ते खातीर ते संबंदीत अधिकारी त्रासांत पडटले. आमी त्या अधिकाऱ्यां फाटल्यान रावतले, अशें कॅ. फर्नांडीस हांणी सांगलें. कॅ. फर्नांडीस हाका परती जाप दितना मंत्री गुदिन्हो हांणी सांगलें, कॅ. फर्नांडीस फक्त नकारात्मकता पातळयतात. उदरगतीच्या कामां कडेन तांचें वांकडे आसा. त्या उड्डाण पुलाचे उंचाये संबंदांत न्यायालयांत गेले उपरांत कांय खांबे कांपचे पडले. हाका लागून लोकांचो पयसो फुकट गेलो, हाका जापसालदार कॅ. फर्नांडीस आनी विरोध करपी आसात, असो दावो गुदिन्हो हांणी केलो. दाबोळी विमानतळ केन्नाच बंद जावचो ना. आमी त्या विमानतलाच्या विस्ताराचें समर्थन करतात, अशेंय गुदिन्हो हांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
