भांगरभूंय | प्रतिनिधी
पणजी: गोंयच्या सायबर गुन्यांव पुलिसांनी एका व्हड सायबर फटवणूक प्रकरण उक्तडार हाडून वट्ट ९ राज्यांत पातळिल्ल्या गुन्यांवकारी सिंडीकेटाक उक्तें केलें. दक्षीण गोंयच्या कांसावले हांगा रावपी एका नागरिकाक ’डिजिटल अटक’ करपाचो भंय दाखोवन आरोपींन वट्ट २ कोटी ८० लाख रुपयांची फटवणूक केल्ली. ह्या प्रकरणांत १६ ऑक्टोबराक कागाळ दाखल केल्ली. पुलिसांनी भारतीय न्याय संहिता आनी आयटी ऍक्ट खाला गुन्यांव नोंद केलो.
घोटाळो कितें म्हूण आशिल्लो?
गुन्हा दाखल केल्ल्या कागाळदाराक ४ सप्टेंबर ते ९ ऑक्टोबर २०२५ ह्या काळांत दोन वेगवेगळ्या व्हॉट्सप नंबरां वेल्यान मेसेज आयले. दुबावितांनी स्वताक ईडी अधिकारी म्हूण दाखयलें आनी कागाळदाराचें आधार कार्ड मनी लॉन्ड्रिंग प्रकरणांत वापरिल्ल्याचें सांगलें.
ह्या भंयाक लागून कागाळदाराक आरोपींनी घरांतूच ’हाऊस अरेस्ट’ करून भायर वयचें न्हय म्हूण निर्देश दिले आनी हें प्रकरण मिटोवपा खातीर चेंपण हाडलें. भियेल्ल्या कागाळदारान विवीध आरटीजीएस वेव्हारा वरवीं वट्ट २ कोटी ८० लाख रुपया आरोपींच्या बँक खात्यांत धाडले.
आरोपीक रायगडच्यान केली अटक
गुन्यांव उक्तडार हाडपा खातीर सायबर क्रायम पुलिसांनी तांत्रीक आनी अर्थीक विश्लेशणा वरवीं तपास सुरू केलो. पुलीस उपनिरीक्षक मनीष दाभाळे हांच्या नेतृत्वा खाला पंगडान तपास सुरू केलो. ते महाराष्ट्रांतल्या रायगड मेरेन पावले. थंय दिवाकर वरुण झा (३०, रा. ताळोजी माजकूर, रायगड) हाका अटक केली.
९ राज्यांनी घोटाळ्याचें कनेक्शन
चवकशेंत एक धक्को दिवपी म्हायती उक्ती जाली. अटक केल्लो आरोपी दिवाकर झा हाच्या बँक खात्यांत फटवणुकीची ५० लाख रुपयांची रक्कम जमा जाल्ली. जी तांणी रोखडीच आपल्या वांगोड्यांच्या खात्यांनी वळयली. विशेश म्हळ्यार, हे एकूय बँक खातें गोंय सोडल्यार मध्य प्रदेश, राजस्थान, आंध्र प्रदेश, बिहार, मिझोराम, तामिळनाडू, तेलंगणा आनी गुजरात अशा ९ राज्यांतल्या ११ हेर सायबर फसवणूक प्रकरणां कडेन जोडलां. ह्या सगल्या प्रकरणांची एकठांय फटवणूक रक्कम ७ कोटी ४७ लाख रुपया इतली आसा. अटक केल्ल्या आरोपीक न्यायालयांत हाजीर केला. ताका पुलीस बंदखण आयकयल्या. सायबर गुन्यांव पुलीस ह्या घोटाळ्याचो खोलायेन तपास करतात.
उत्तर गोंय पुलीस अधीक्षक राहुल गुप्ता, सहाय्यक अधीक्षक बी व्ही श्रीदेवी हांच्या मार्गदर्शना खाला आनी सायबर गुन्यांव पुलीस स्टेशनाचे निरीक्षक दीपक पेडणेंकार हांच्या नेतृत्वा खालां पंगडान उपनिरीक्षक मनीष दाभाळे आनी पंगडान ह्या प्रकरणाचो सोद लायलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
