भांगरभूंय | प्रतिनिधी
पणजी: गोंयच्या पणजी-मडगांव राष्ट्रीय महामार्गावेलो बांबोळी पट्टो सध्या अपघातांचो वाठार जावन पडला. फाटल्या फकत पांच दिसांनी ह्या रस्त्याचेर तीन व्हड अपघात जाले. हातूंत दोगांक मरण आयलां. बांबोळेच्या नियाझ रेस्टॉरंटा लागसारचे देंवतेर हे अपघात सेगीत घडिल्ल्यान ह्या वाठारांतले सुरक्षिततायेचो प्रस्न निर्माण जाला.
टँकर-गाडयेचो भिरांकूळ धडक
मंगळारा रातच्या १ वरांचेर हे अपघात जावपाक सुरवात जाल्या. देंवतेचेर टँकर चालकाचें नियंत्रण सुटिल्ल्यान तांणी डिव्हायडरा पलतडी वचून विरुद्ध दिकेन येवपी ‘रेंट अ कॅब’ गाडयेक धपको दिलो. ह्या धपक्यान गाडी पुरायेन काबार जाली. हातूंत ’रेंट अ कॅब’च्या चालका सयत दोगांक जाग्यारूच मरण आयलें. मरण आयिल्ल्यां मदीं ऑल इंडिया सेपक टाक्रॉ असोसिएशनाचे अध्यक्ष योगेंद्र सिंग आनी खेळगडो अंकित कुमार बलियान हांचो आसपाव आसा. पोरणें गोंय पुलिसांनी टँकर चालक राहुल सर्वदे हाचेर गुन्यांव नोंद करून ताका ताब्यांत घेतला.
उपाय येवजचेचे निर्देश दिवनूय अपघात चालूच
हो भिरांकूळ अपघात ताजो आसतनाच बांबोळे ६ नोव्हेंबराक आनीक एक अपघात जालो. वेगान आशिल्लो नुस्तें येरादारी करपी कंटेनर नियंत्रणा भायर वचून दिवायडराक आपटलो. हे घडणुकेंत कोणाक कांय जावंक़ ना.
हांगा अपघातांचो वाडपी आंकडो पळोवन मुख्यमंत्री डॉ. प्रमोद सावंत हांणी बेगबेग घडणुके सुवातेक भेट दिली. ह्या वेळार तांणी येरादारी पुुलीस अधीक्षक आनी भौशीक बांदकाम खात्याच्या अधिकार्यां वांगडा पळोवणी केली. बांबोळे महामार्गार ह्याच पट्ट्यांत जायते अपघात जाल्यात. रोड इंजिनिअरिंगचो अभ्यास करून गरजेच्यो सुधारणा करपाचे तशेंच बॅरिकेड्स लावपाचे आदेश दिल्यात, अशी म्हायती मुख्यमंत्र्यांनी दिल्ली.
मात, मुख्यमंत्र्यांच्या निर्देशा उपरांतूय अपघात जावप बंद जावंक ना. काल, ८ नोव्हेंबराक रातच्या १० वरांचेर हेच सुवातेर परत एक फावट ट्रक आनी गाडये मदीं अपघात जालो. फाटल्या पांच दिसांनी ही तिसरी घडणूक. ह्या अपघातांत कोणाक कांय जावंक ना.
बांबोळे महामार्गार ह्या वाडपी अपघातांक लागून ह्या वाठारांतले रस्ते सुरक्षा उपाय येवजण्यो आनी ’रोड इंजिनिअरिंग’च्या दर्जाचेर गंभीर प्रस्न उबो रावला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
