भांगरभूंय | प्रतिनिधी
पणजी : दर्यादेगो आनी हेर पर्यटन थळांचेर पर्यटकांक ओडीत तांकां विवीध पर्यटन विशयाचे पॅकेजींची म्हायती दिवपी बेकायदो टावट्स आनी एजंटा आड कळंगुटे पुलिसांनी खर कारवाय सुरू केली. पुलिसांनी कळंगूटे दर्यादेगेर गस्त दवरून १३ टावट्सांक ताब्यांत घेतले. हातुंतल्या दोगां जाणां आड गुन्यांव नोंद केला.
पुलीस अधिक्षक राहूल गुप्ता हांणी ही म्हायती दिली. कळंगूटे तशेंच हेर दर्यादेगांचेर दिसान दीस टावट्सांचो आंकडो वाडतूच आसा. पर्यटन हंगाम सुरू जाल्ल्यान राज्यांत बेकायदो टावट्सूय वाडल्यात. ह्या टावट्सांचो पर्यटकांक बरेच त्रास जातात. बेकायदो टावट्सांआड कडक कारवाय करपाचे आदेश सरकारान दिल्यात. हाचोच भाग म्हणून पुलिसांनी आतां कारवाय सुरू केल्या. सगल्यो दयारदेगो तशेंच हेर पर्यटन थळांचेर टावट्सां आड कारवाय सुरू जातली.
नव्या वर्साचे फाटभूंयेर राज्यांत आतां पर्यटकांचो आंकडो वाडटलो. टावट्स वा एजंटांचो त्रास जाता जाल्यार वा जातना दिसल्यार पुलिशेंत कारवाय करची, असो उलो पुलीस अधिक्षक राहूल गुप्ता हांणी मारलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
