भांगरभूंय | प्रतिनिधी
मुख्यमंत्री: नागरिकांनी अशे तरेच्या इव्हेंटांक विरोध करचो न्हय
पणजी: आयर्नमॅन 70.3 सारकिल्ल्या आंतरराष्ट्रीय इव्हेंट्सांक लागून कांय प्रमाणांत गैर वेवस्था जाता. मात राज्याचें पर्यटन वाडोवपा खातीर अशे तरेच्या इव्हेंटांचे व्हड मजत जाता. हाका लागून नागरिकांनी अशे तरेच्या इव्हेंटांक विरोध करिनासतना सहकार्य करपाची गरज आसा, अशें मुख्यमंत्री डॉ. प्रमोद सांवत हांणी ’आयर्नमॅन 70.3 गोवा 2025’ ह्या नामनेच्या आंतरराष्ट्रीय ट्रायथलॉन सर्तीचे उक्तावण कार्यावळी वेळार म्हणलें.
गोंयांत ’आयर्नमॅन 70.3 गोवा 2025’ ह्या नामनेच्या आंतरराष्ट्रीय ट्रायथलॉन सर्तीच्या पांचव्या पर्वाक आयज फांतोडेर 3 वरांचेर सुरवात जाली. हे सर्तींत वट्ट 31 देशांतल्या 1300 परस चड एथलीट्स वाटेकार जाल्ले.
आयर्नमॅन 70.3 ही एक सामकी आव्हानात्मक सर्त. हातूंत ऍथलीट्सांक सुरवातेक अरबी दर्यांत 1.9 किलोमीटर पेंवप, उपरांत दर्या देगेर आनी भितरल्या रस्त्यांवेल्यान ९० किलोमीटर सायकल चालवप आनी निमाण्या टप्प्यांत पणजेच्या रस्त्यांवेल्यान 21.1 किलोमीटर धांवप (हाफ मॅरेथॉन) अशे तीन टप्पे पुराय करचे पडटात.
हे सर्तीच्या उक्तावणाक मुख्यमंत्री डॉ. प्रमोद सावंत हाजीर आशिल्ले. तांणी हे आंतरराष्ट्रीय सर्तीक लागून गोंय कशें एक व्हड ’स्पोर्टिंग हब’ जाता आनी आंतरराष्ट्रीय खेळां पर्यटन कशें चालीक लागता हाची तोखणाय केली.
अंदूंचे सर्तींत वर्ल्ड चॅम्पियनशिप खातीर पात्र जावपा खातीर सर्त करपी एलिट ऍथलीट्स तशेंच पयलेच फावट वाटेकार जावपी हौशी मेच्युअर ऍथलीट्सांचो आसपाव आसा.
मजगतीं, हे सर्ती मजगतीं कसलेच तरेची गैरसोय जावची न्य म्हणून गोंय येरादारी पुलिसांनी ही सर्त सोंप मेरेन खुबश्या रस्त्यांचेर बदल आनी बंदी जाहीर केल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
