भांगरभूंय | प्रतिनिधी
येजमान ऑस्ट्रेलिया आनी भारत ह्या पंगडां मदली पांचवी आनी निमाणी टी-20 मॅच पावसाक लागून रद्द करची पडली. अशे तरेन भारतान माळ 2-1 फरकान जिखली. पांचवे टी-20त फक्त 4.5 ओव्हरीचोच खेळ जालो. भारतान बिनबाद 52 धांवड्यो केल्ल्यो. निकालाचे दिश्टीन ही मॅच म्हत्वाची आशिल्ली.
शुभमन गिल आनी अभिषेक शर्मा हांणी भारताक जलद सुरवात करून दिली. मॅच वेळार सुरू जाल्ली. ऑस्ट्रेलिया पंगडान टॉस जिखून पयलीं भारताक बॅटींग करपाचें आमंत्रण दिल्लें. ऑस्ट्रेलिया पंगडान आपल्या इकरांत कसलोच बदल करूंक नाशिल्लो. भारतान तिलक वर्माक विसव दिवन ताचे सुवातेर रिंकू सिंगाक संद दिल्ली. पूण, रिंकूक बॅटींग करपाची संद मेळ्ळी ना.
पावसान आडखळ हाडिल्ले मॅचींत एक पराक्रम आपल्या नांवार केलो. टी-20त जलद रितीन एक हजार धांवड्यो पूर्ण करपी भारताचो दुसऱ्या क्रमांकाचो बॅट्समन थारलो.
मजगतीं, हे मॅची पयलीं शुभमन गिलाचो फॉर्म पंगड वेवस्थापना खातीर हुस्क्याचो थारिल्लो. पूण, ब्रिस्बनांत तिसरे ओव्हरींत ड्वारस्विसाक चार चवके मारून आपूण फॉर्मांत आयिल्ले संकेत दिले.
ताणें 16 बॉलांनी नाबाद 29 धांवड्यो केल्यो. हातूंत स चवक्यांचो आस्पाव आशिल्लो. अभिषेकान 13 बॉलांनी नाबाद 23 धांवड्यो केल्यो. ताणें एक चवको आनी एक सको मारलो.
धांवड्यांचो पावस चालू आसतना हवामानान आपलो रंग बदल्लो आनी पावसान आपली हाजेरी लायली. अंपायरांनी बरोच वेळ पावस थांबतलो म्हणून वाट पळयली. पूण अखेरेक तांणी मॅच रद्द करपाचो निर्णय घेतलो. पावसाक लागून माळेंतली दुसरी मॅच रद्द करची पडली. कॅनबरांत जाल्ली पयली मॅच लेगीत पावसान व्हांविल्ली. दुसरी मॅच ऑस्ट्रेलिया पंगडान जिखून माळेंत 0-1 अशी आघाडी घेतिल्ली. पूण, ते उपरांत भारतान पुनरागमन करतना तिसरी आनी चवथी मॅच जिखली.
फुडल्या वर्सा भारतांत संवसारीक टी-20 सर्त जावपाची आसा. ते दिश्टीन दोनूय पंगडां खातीर ही माळ म्हत्वाची आशिल्ली. पंगड वेवस्थापनान संवसारीक टी-20 सर्तीचे दिश्टीन पंगड तयार करपाचेर भर दिल्लो. ते खातीर पंगडांत तीन स्पिनरांक प्राधान्य दिल्लें.
मजगतीं, 2012 सावन भारताचो पंगड ऑस्ट्रेलियेंत टी-20 माळ हारूंक ना. ऑस्ट्रेलियेंत 2008त निमाणे खेपे टी-20 माळेंत भारत हारिल्लो.
अभिषेक शर्माची प्लेयर ऑफ द सिरिज पुरस्कारा खातीर निवड केली. ताणें पांच मॅचींनी 40.75चे सरासरीन एक अर्द शेंकड्याच्या नेटार 163 धांवड्यो केल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
